SOOLLA 52 - Boy Lonana

Kaɓak ma vi Lonna

¹ Soolla vi sa ma fok suu gi soollana, soolla haɗta vi David.

² Gaɗ ni hu li ma Doeg ma Edomma tuɗ di Sol ana David ka vi Ahimelekŋa.

³ Aŋ ŋga taŋ kay dla cora na ni amege, aŋ sa ma las suuna, jivira vi Lonara ka hu buuna halaŋ.

⁴ Siniŋ njaɗ ni dlara ci maɗna, siniŋ ki guuri ko vella na, siniŋ ganyamba zak zak.

⁵ Aŋ min dla cora a sura jivira, min kaboyna a su boy ma gasina.

⁶ Aŋ di ni boy ma ɓeŋ huu suuna, dlara aŋ laɗta halaŋ coo.

⁷ Kay ndaɗta Lona baaŋ kini a fafaɗta, nam dikiŋ ay ki hu ziiŋŋa, nam dikiŋ ki hu ndaŋgara suu iirina ka hura.

⁸ Suu ɗegeena wi li namma, asi hin lam ndaaramu, asi hin san uŋu.

⁹ Gola, sa ma ka ŋgay tam eg Lonaɗina, nam tin saaram mi kay bege mamba, nam saa ana mbeleŋ mamma hin suɗumu.

¹⁰ An hu Ziŋ Lonana ni ko cono ma humum ka ɗuffi jivina na, an hin tanni ko ɗegeera fi Lonara a fafaɗta.

¹¹ Tew tew ni an gaŋ deɓpa, kay aŋ li sunda wa, an daŋ jivi maŋga ki duk njaf suu mansina halaŋ.