SOOLLA 51 - Boy Lonana

Cenda homba

¹ Soolla vi sa ma fok suu gi soollana, soolla vi David.

² Hu li ma sa jok vun Lona, Natan, tuɗ egem ŋgoo li ma nam taɓ u Batsebana.

³ Wan hahawan u jivi maŋga, Loonna, u oo maŋga ŋgolla bulumun coonda kiyo.

⁴ Mbusun ki ko coonda na mbus ge, ɦokon ki ko suluk manna.

⁵ Kay an wi coonda wa, an ka waɗ fokon hu buuna tew tew.

⁶ An li co ndaɗta ni egeŋ aŋ na dew, an li dlara ka iriŋ jiviɗira. Kay ndaɗta aŋ ɓakŋi u voɗoɗu, ɓak maŋŋa, ŋgul ka huɗi.

⁷ An vuɗ ni hu dla cora, sun van wiirinni hu dla cora lay.

⁸ Aŋ may ni minni huu ma jivina, duk ndufun manda aŋ takan neeŋga.

⁹ Mbusun coonda ki u conora, an hin mbuɗ ki teteɗ, mbusun kiyo an hin mbuɗ ki haɓ su baraw haɓma.

¹⁰ Hinin an hum soolla furira u ayra, hin sokon ma aŋ kusum kina furiya.

¹¹ Pereɗ iriŋ kiyo, golon coondaɗi, coonda halaŋ aŋ bulumunda kiyo.

¹² Ҥi, Lona, mbuɗun huu ma jivina hurunu, kalan ŋgussa wilira hurun may.

¹³ Dikin ha ki day egeŋgi, paɗan Musuk maŋga teteɗta ki hurunɗi.

¹⁴ Ҥan furira a kal hu suɗ maŋga, hin a ŋgussa jivira takan voɗta.

¹⁵ An hin takaŋ voɗ maŋga maŋ suu li dla cora may, suu li cora hin hoŋ irisi ay egeŋu.

¹⁶ Loonna, Lo ma suɗta, suɗun ki ko busuna, hin a vunun daŋ ki ni ɗegee maŋga.

¹⁷ Bu Suuna, malan vunun kiyo, hinin an gi ni soolla ŋgaaŋga.

¹⁸ Aŋ ka min ana an laŋ ɓivunu naɗi, aŋ ka minni ɓivun ma ŋgal tlena ɦawaɗi.

¹⁹ Ɓivun ma Lona minimma ni huruŋ ma haɗ kay cooŋgana, Lona, aŋ ka dik sa ma hurum haɗ kay coombana ki fafaɗ gawɗi.

²⁰ Li jivira maŋ ɦoŋzi ma Siyonna, hoŋ min Yerusalem koloo.

²¹ Ni aŋ hin minni ɓivun ma ay ɓiirina, ɦalla ɦal maŋ Lona u ɓivun ma ŋgal kina. Ni suuna hin ŋgaɗ mbutlina hu givin ma togolla maŋŋa ma ɓivunna.