SOOLLA 50 - Boy Lonana

Lona ni sa ma kaɓakŋa

¹ Soolla vi Azaf. Lo ma kay loogina halaŋŋa, Yawe, nam ɓakka, nam yi suuna halaŋ, suu u maɗiinana ta ta suu u fiɗiginana.

² Ay hu Siyon, li ma jivi pasiyakŋa, Lona ka weleɗ ay huwa.

³ Looygina ka mbaya, nam ka seŋ tambi. Kura ŋgolla ay ka fokomu, babaa ma ŋgolna ŋguyum yamu.

⁴ Nam yi huulona u ndaŋgara ay egem, a suu di ki kamma a kaɓakŋa kay suu mamsina.

⁵ Tokogi aya suu man suu ɗegeena, suu vi galamba u an ha ɓivunnana.

⁶ Huulona tak ɗegee mamba kiyo, sa ma kaɓakŋa ni Lona.

⁷ Humugi haa suu mansina, an min ɓakka, aŋ Israel, an min di dlara kaŋga. «Anni Lona, ni Looŋŋa.»

⁸ An gaɗaŋŋi ka kay ɓivun maŋŋaɗi, tew tew ni ɓivun maŋŋa ka fokonu.

⁹ An ka min mbutl maŋŋaɗi, ka min ŋgeki suu hu kaa maŋŋanaɗi lay.

¹⁰ Kay mburi suu ŋgoo bagina halaŋŋi varanu, u vabakgina ŋgoo halaŋŋi mansina.

¹¹ An wi laygi suu bagina halaŋ ŋgora halaŋŋi varanu.

¹² Lini mayra canu, an ka joɓoŋgi, kay duliyara u tlesuu kaɗna halaŋŋi varanu.

¹³ An kom gasi tliw mbutlina su? An ci gasi busu ŋgekgina su?

¹⁴ Ɓivun ma agi lam maŋ Lonna ni ŋgara ŋgaamba, dlara aŋ di ki u vunuŋ ana, aŋ laɗ maŋ Lonara, aŋ laɗu.

¹⁵ Na ɗaŋŋi yan hu li ma dlara faŋŋa, an hin suɗuŋ kiyo, aŋ hin ŋgaan may.

¹⁶ Lona di suu li dla cora ana, agi ndumun gaɗ manda ni kay mege? Agi ɓak kay galam manda u vunugi ni amege?

¹⁷ Aŋ sa ma ka ŋgelen gaɗ mandana, aŋ sa ma cukun boy manna ki ŋgoroŋ daganna.

¹⁸ Lini aŋ wi sa ma kulna wani, aŋ mbuɗ ni a banamma. Poy maŋga aŋ poy ni vi suu li zoŋga.

¹⁹ Vunuŋ di ni boy cona sak sak, aŋ taɓ vunuŋ u suu kaboyna.

²⁰ Aŋ kak nje ni tummi u wayaŋŋa, aŋ ɓalak gorseŋŋa ki u dla cora.

²¹ Gola ni dlara aŋ laɗta, ni an hin seŋ gasi tan na ɗaŋ su? Aŋ saa ana anni ko ndal aŋ na may su? An takaŋ dlaaŋga aŋ laɗta ki fokoŋ halaŋ.

²² Humugiya, agi suu maa Lona kina, lini ka naɗi a an baagi ki halaŋ, hin sa dewɗi, sa ma buɗugi ki kaɗi.

²³ Sa ma ŋgaanna, lan unna ni ɓivun namma, sa namma an hin takam voɗta vi Lona ta suɗta.