SOOLLA 49 - Boy Lonana

Sana miɗni ka tuɗ u va kombi

¹ Soolla vi sa ma fok suu gi soollana, soolla vi goryoŋ Korena.

² Humugi haa agi njaf suuna halaŋ, jeɓeeregi jiviya agi suu hu duliyarana bel,

³ suu ŋgolona, suu gorina, suu ɦizina, suu hawra, agi halaŋ.

⁴ Boy ma vunun dam ha kina nera ka huwa, hurun saa ni kay dlara jivira.

⁵ An tin humun a hum vun ŋgolna, hu li ma an ci diŋŋa ni an gi u dlara ŋgayra kiyo.

⁶ An hin li ndaana ko buu ma cona ni kay mege, lini suu babali mansina ŋgufun yan ki na cutl lay?

⁷ Asi ŋga tasi kay ɦiz masira u suu ŋga tasi kay begera.

⁸ Sa war ma ndak a gus iirira vi ndaram fok Lona kaɗi, ma ndak a gus iiri mamba kaɗi lay.

⁹ Lini sana warak begera a gus iiri mamba ni, ndaɗ hin ba ki ni baay na ɗow.

¹⁰ Nam saa ana iiri mamba hin kak ki zeɗ su? Nam ka ndak puruɗ ki ko miɗnaɗi.

¹¹ Ay ka wi suu neeyna miɗ ki ko tasi u suu puluɗina u suu giniŋŋa dew. Asi hin bege masira ka ki maŋ suu daŋŋa.

¹² Asi saa ana ziisina ka ɓalak kiɗi. Li ma asi cuki huna ni a fafaɗta. Asi tli mbassa ki ni masiya.

¹³ Sa warna bibiŋil mamba ka ɗik faɗɗi, nammi ko tle bagi suu miɗ kina na.

¹⁴ Gola ni daɓpa vi suu laɓana, suu tin saa masira kay tasi holna, u suu may suu min njaɗta fiyekka.

¹⁵ Asi ni ko yoori suu cuki hu li ma ŋgaɗta na, miɗna ka taarasi ni namu. Suu ɗegeena hin ti mulla kasiya. Asi vaɗ ki ni ko ndoosna na. Asi mbuɗ ha ki day eg ziisi ma jivina.

¹⁶ An may ni Lona gusun iiri manda ay ki hu lina vi suu miɗina. Nam hin tlanu.

¹⁷ Lini sana ka ɦiz tam lay ni ɓig vun dikiŋgi, lini fiimma ka wul vo lay.

¹⁸ Kay hu li ma nam miɗna ni, ka tli va kom dewɗi, Bibiŋil mamba ka kal ga umbi lay.

¹⁹ Hu li ma nam iiriya ni nam li u tamu, suuna ko kosi umu kay dlaamba halaŋ tuɗ jiviya.

²⁰ Nam hin tuɗ ni hu li ma somoyom ha huna, ni li ma asi ka a wi kiɗikka oloɗina.

²¹ Sana u ŋga taamba hum boy namma kaɗi, nammi ko tle bagi suu miɗ kina na.