SOOLLA 48 - Boy Lonana

Ҥinira Siyonda ni ɦoŋzi ma vi mulnana

¹ Soolla vi goryoŋ Korena.

² Yawe, nam ŋgol cocoo, nam ndaki a sa ŋgaamu. Hu ɦoŋzi ma vi Looyginana kay ɦini mamba teteɗta.

³ Ҥinira fiyek ndaɗta jivi cocoo. Ҥoŋzi ŋgol ma vi mulna namma furi huu suu hu duliyarana halaŋ. Ha ki hu keŋ ma daɓ ay mbayawna ni, ni ɦinira Siyonda, ni ɦoŋzina vi mul ŋgolna.

⁴ Hu zi ŋgolla Siyonda, ni, Lona, suuna wam a ɦoŋzi ma saɓakŋa.

⁵ Suu mulina vi vun tasiya, tok tasi a ŋgaf mul ma Siyonna.

⁶ Na gaw ni asi mbuɗ ki ndaa cocoo, asi yow liŋŋa ŋgay ni na gaw.

⁷ Tasi mbuɗ dlak cocoo, ko cara wiina hal a vuɗtara na.

⁸ Ni babaa ma u maɗiinana, hawaɗ lum kawi ma Tarsisna ki wa.

⁹ Dlara ay humuɗ ay jewra, cemi aygi waɗ ki u iriygi hu ɦoŋzi ma vi Yawe, ma Saɓakŋa Kom Belna, ni hu Ziŋ Looyginana, Lona hin golom na gak gak.

¹⁰ Lona, hu ziiŋga ami min a takaŋ ɗegee maŋga kiyo.

¹¹ Ko ndal seŋ na may, Lona, ŋgara ŋgaaŋga ndak ha ki kay yam mbassa halaŋ. Bikiŋ ma njufna oy u dlara ɗegeera.

¹² Ҥinira Siyonda ka furiya, goryoŋ Yudana halaŋ ka aya, ni kay ɓak ma aŋ kaamma.

¹³ Ŋguyugi yam gulumun ma Siyonna, ndum zigini suu kolo day dayna.

¹⁴ Gologi gulumunna gige, ndumugi zigini suu huna, agi hin di dla ndaɗta ka ki maŋ njaf suu hin ka ŋgorogi daganna.

¹⁵ Lona ni Looygina a fafaɗta, nam ka tuɗ u aygi tew tew.