SOOLLA 46 - Boy Lonana

Yawe ka u aygiya

¹ Soolla vi sa ma fok suu gi soollana, soolla vi goryoŋ Korena, kay gorɓiina.

² Lona ni sa ma ay ŋgay umma, nammi ɦoŋziiygi ma saɓakŋa, lassa fayra, nam njunuya.

³ Kay ndaɗta ay ka li ndaaɗi, lini ndaŋgara geŋeɗ lay, lini ɦinira paɗ ha ki ndi ki duk mbo ŋgolna lay, ay ka li ndaaɗi.

⁴ Mbona ɓaɗ u bilna coco lay, ndaŋgara mbuɗ geŋeɗ lay, ɦinira geŋeɗ coco lay.

⁵ Mbo lum ma namma vun kom furi suu hu ɦoŋzi ma vi Lonna cocoo, ni zi ma ki teteɗ ma vi Lonna.

⁶ Lona ka hu zi namma, nam ka geŋeɗɗi, Lona ka njunummi maɗii feɗet.

⁷ Njaf suuna ka yal cocoo, mulla halaŋ mbuɗ ki ndaana, nam ɦal gaɗta na ni, ndaŋgara wak kiyo.

⁸ Yawe, ma Saɓakŋa Kom Belna, ka u aygiya, ɦoŋziiygi ma saɓakŋa, ni Loŋ Yakobma.

⁹ Tuɗugiya, gologi sunda Yawe laɗta, tlesuu nam ɓalakasi ki kay ndaŋgarana.

¹⁰ Nam doo duuna ki kay yam mbassa halaŋ, nam kus mbuurura u saɓpa kiyo, nam ŋgal pus pus ma duuna ki lay.

¹¹ Cukugi ɓagina kiyo, wagi ki ana anni Lona, an su kay njaf suuna halaŋ, su kay ndaŋgara lay.

¹² Yawe ma Saɓakŋa Kom Belna ka u aygiya, ɦoŋziiygi ma saɓakŋa, ni Loŋ Yakobma.