SOOLLA 45 - Boy Lonana

Soolla kay ɗumba vi mulna

¹ Soolla vi sa ma fok suu gi soollana, soolla a haɗta u minda vi goryoŋ Korena, gaɗ u lis.

² Hurun ki oy u boy ma jivina, an gi sool manda ni a ŋga mulna. Ko sinin di boy ma jivina ko ndal sa ma wi ɓiira jivi ɦayna na.

³ Aŋ jivi su suuna halaŋ, oora ɓaɗ ay ki funuŋ ko yona na. Lona paɗ vunum ki kaŋ a fafaɗta.

⁴ Njun ŋgew maŋŋa huruŋu, mul ma duuna, malaŋ ŋgolla ma suuna ŋgaam bel belna.

⁵ Tuɗ hu voɗ maŋga, aŋ ti mulla, tuɗ u gasira ka ɓak ma ɗegeena, ɗegee maŋga ni u oora. Koŋ ma njufna njunuŋ hu dlara aŋ laɗta halaŋ.

⁶ Mbuuru maŋga njaŋaraŋŋa saɓak cocoo. Suuna halaŋ cuk kaŋga uŋu, suu babali maŋsina halaŋ goɓ ga fokoŋu.

⁷ Mulla Lona haŋgara kak na din din, aŋ ti mulla kay suuna ni u ɗegeera.

⁸ Aŋ minni dlara jivira, ka min dla coraɗi, kay ndaɗta Lona, Lo maŋŋa fuuruŋ u mbul ma furira, nam miniŋ su ndarayaŋŋa halaŋ.

⁹ Baraw maŋŋa, tam his u mbul ma his jivina zeɗ zeɗ. Aŋ kal ay ki hu ziiŋ ma mulla na ni, soolla furiyuŋ huruŋga kaa.

¹⁰ Gorɓii suu vi mulinana ka coli egeŋ, u walakka kosi may, humusi may. Caaŋga ka coli bikiŋ ma njufna u lorra koɗu.

¹¹ Hum haa, goonda, gola tin humuku, maa ki kay suu maksina u somoyoku.

¹² Kay mulna mba golok jiviku, nam mbuɗ ni malakŋa, goɓ yak kaŋga fokomu.

¹³ Suu hu zi ma Tir suu ɦizi cocona, hin mba mbaɗak iirik u begera.

¹⁴ Gola, goŋ mulnara ka voo, ndaɗ jivi ɦay, vun baraw maɗta fiyekka ki ŋgufi u lorra.

¹⁵ Baraw ma cuki taɗna tam ndalira na, kolo kolo, gorɓi suu daŋŋa tuɗ kay cereɗ may. Asi halaŋ mbay fok mulna.

¹⁶ Asi mba egem u furira cocoo, asi cuk vo taraŋ vi mulna.

¹⁷ Ndak hin fi gorra cocoo, asi mbuɗ ki ni somoyoku. Goryok hin lak ha ki a mulina kay yam mbassa zeɗ zeɗ may.

¹⁸ An may ni hin tiirik sek ha ki hu cokira halaŋ, suuna hin geleɗek na gak gak.