SOOLLA 44 - Boy Lonana

Cenda kay a hal suɗta

¹ Soolla vi sa ma fok suu gi soollana, soolla haɗta vi goryoŋ Korena.

² Ҥi, Lona, ami hum ki u humumiya, kay dlara aŋ laɗ ay jew u somoyomira, somoyomi haɗamira ka lay.

³ Aŋ u taŋga dikisi suuna ki fokosiya, aŋ cuk suu maŋsina ki hu mbas masira. Aŋ ba njaf suu daŋŋa ki halaŋ, na may suu maŋsina aŋ zulusi ni zuli na ɗow.

⁴ Asi ti mbassa ni ka u saɓak masinaɗi, tlegeyesi suu duuna suɗusi ka ni asiɗi lay, ni u bik koŋ ma njufna, u kiɗik maŋga kay aŋ minisi ɦay.

⁵ Ҥi, Lona, aŋŋi mul manna, di dlaaŋga, Yakob hin su kay suuna.

⁶ Ami su kay suuna ni u njun maŋga, ami tay suu gonok mamsina ki ga ni u seŋu.

⁷ An ka tin saaran kay mbuuru manda kon wandaɗi. Ŋgew manna ka ndak a ɦan saɓak ma su kay saɗi lay.

⁸ Aŋ taŋga mbuɗumi a su kay suu babali mamsina ni aŋu, aŋ mbuɗumi suu gonok mamsina ki zolona wa.

⁹ Hu buuna tew tew ami gi soolla ŋga Lona, ami ka geleɗeŋ seŋ tew tew.

¹⁰ Na lay cemi ni aŋ noyomi ki wa, aŋ ka kal ki a ŋgaf suu duu u amina oloɗi.

¹¹ Aŋ mbuɗumi yow liŋŋa fok suu babali mamsina, suu gonok mamsina ɦurumumi tlegeyemi ki wa.

¹² Aŋ hinimi kosi ko timigii suu ŋgaɗta na, aŋ njayami ki duk njaf suuna.

¹³ Aŋ vi va ma gus ka kasiɗi lay, aŋ ɦal suu maŋsina ki bay joɓ va kasiya.

¹⁴ Aŋ hinimi ko pan ma vi suu vok ziimina, suu ŋguyumina halaŋ ka san umiya.

¹⁵ Aŋ mbuɗumi ni a njun njunda vi njaf suu daŋŋa, suuna halaŋ mba kisik yasi fokomiya.

¹⁶ Hu buuna halaŋ an ka wi pan namma, irin kuluɓ ki zolona cocoo.

¹⁷ Ko pan ma vi suu babali mansina, cemi asi ka sa sukulusiya.

¹⁸ Dla ndaɗta mba kami na lay ni, humumi ka maa ki kaŋgi. Ami maaraŋ galam maŋga ka kiɗi.

¹⁹ Ami ka hin tuɗta kay seŋga kiɗi, ami ka hiniŋ voɗ maŋga kiɗi lay.

²⁰ Aŋ hinimi ki ŋgoo bagi duk vabakgina, ami cemi laki hu li ma ndufun cocona.

²¹ Lini ami maa ki kay Loomina lay, lini ami pereɗ irimi u loogi suu daŋŋa lay,

²² Lona aŋ ndak a wi lay. Aŋŋi sa ma wi saara huu suu warnara.

²³ Asi cami ki hu buuna tew tew ni kay seŋu, asi lami ko timigii suu ŋgaɗta na.

²⁴ Bu Suuna dliɗ ki koloo, Aŋ buu senna amege? Col ki koloo, hinimi ki a fafaɗtaɗi.

²⁵ Aŋ ŋgay taŋ ki irimi ni amege? Humuŋ maa ki kay wihaw mamira wa su?

²⁶ Kay vunumi ka pii ga duk ndaŋgara, ami buuri ni ga duk buɗna, asi su kami wa.

²⁷ Col koloo, njun umiya. Suɗumi ki u ɗegee maŋga.