SOOLLA 42 - Boy Lonana

SOOLLA 42—72 Yoora vi sa ma ha ki ŋgayrana

¹ Soolla vi sa ma fok suu gi soollana, soolla haɗta vi goryoŋ Korena.

² Ko ndal dukka na an mbuɗ irin hal li ma yona ka huna, ni na may, iiri manda hoŋ iriɗ egeŋu, Loonna.

³ May Lona kan cocoo, Lo ma iirina, an hin kal kalafi a col fok Lona ni saɓage?

⁴ Faali lay, njeŋge lay, simina mbuɗ ko vaan ma tira na, hu li ma asi ka dan tew tew ana, «Looŋŋa ka ni arage» na.

⁵ Jew ni an tuɗ hu Ziŋ Lonara ko tan u suuna, dukusi ni an ka furi cocoo. An li luuna u furira, gi soolla ŋga Lona, humun gan kay boy namma wa ni hurun haɗ cocoo.

⁶ Ŋgus manda, va ma ndak a fam hu tiinana ni mege? Ndak yoo takŋi kay mege? Saa ni kay Lona na ɗow. Na daŋ may, an hin ŋgaam olo, nammi sa ma suɗunna, ni Loonna.

⁷ Hurun ka haɗ cocoo, Loonna, kay ndaɗta an ceneŋ ay hu mbassa Yurdanda, keŋ ɦinira Ŋgora ura Hermonda.

⁸ Mbo ma ɓaɗna ka ŋgaf tam ay na ŋgaf ŋgaf. Nam ɓaɗ irim ay ni kan halaŋ, ko mbona tuɗ kaŋga hu li ma zulzulna na.

⁹ Hu buuna halaŋ ko Yawe takan oo mamba, njeŋgera halaŋ an gi soolla geleɗemba, an cen Lona ma ɦan iirirana.

¹⁰ An di Lona, ɦini manna, ana, «Aŋ maaran ki ni kay mege? An poy u yoora na ni kay mege? Aŋ hin suu babali mansina lasan amege?»

¹¹ Dlaasira mbuɗ egenni ko mbil mbeŋŋa na, hu li ma suu babali mansina ŋgulunna. Tew tew asi ka joɓon ana, «Looŋŋa ni arage?»

¹² Ŋgus manda, va ma ndak a fam hu tiinana ni mege? Ndak yoo takŋi kay mege? Saa ni kay Lona na ɗow. Na daŋ may, an hin ŋgaam olo, nammi sa ma suɗunna, ni Loonna.