SOOLLA 41 - Boy Lonana

Cenda vi sa ma tuguɗiira

¹ Soolla vi sa ma fok suu gi soollana, soolla vi David.

² Furira ka kay sa ma saa kay suu maŋina, hu buu ma wihawra ni Yawe hin buɗum kiyo.

³ Yawe golom iiri u furira hu ndaŋga mamba, nam ka hinim ko suu mam suu babaliraɗi.

⁴ Lini nam buuri tuguɗiiyo ni, Yawe njun umu, garaɗam ki lay.

⁵ An di ana, «Yawe an li coo, na may wan hahawanu, garaɗan kiyo.»

⁶ Suu gonok mansina ka dan cora kanu, asi ana, «Nam hin miɗ ni saɓa, a sem bulum kira nige?»

⁷ Lini sa maa mba golon lay ni ka golla jiviraɗi. Nam mba ni a zulun boy cona ha ki kanda. Nam kal ay kini, njaɗ dla ndaɗta ha ki maŋ suuna halaŋ.

⁸ Suu babali mansina tok tasiya, asi ka hosok tasi kanu. Asi hal ni mbeleŋ ma lasanna.

⁹ Dla coomba tok kammi ndaɗu, vira nam vi ga wanda ni ka col koloɗi.

¹⁰ Banan ma tami ko tami dewna, ma an ɦal hurun ki mam belna lay mbuɗ dan dla cora kanu.

¹¹ Na may aŋ, Yawe, u oo maŋga colon koloo, kay a an sa sukulun ki egesi may.

¹² An wi ki ana aŋ humun wa, aŋ hin suu babali mansina ka a su kanɗi.

¹³ Aŋ njun unu van kon kolo wa, aŋ ka u an hu buuna halaŋ a fafaɗta.

¹⁴ Gi deɓ Yawe Lona vi suu Israelna, gam deɓpa ha na gak gak a fafaɗta. Amin, Amin.