SOOLLA 40 - Boy Lonana

Gi deɓ Lona kay suɗta

¹ Soolla vi sa ma fok suu gi soollana, soolla vi David.

² An ka juɓ Yawe ni day day, nam mbuɗ humum ay egen wa, nam humun tii manna wa.

³ Nam tlan ay ki hu zulla doroɓma, nam colon ki kolo kay li eŋŋa, nam ka golon tuɗ manda.

⁴ Nam takan soolla wilira, ni soolla ŋgaaygi Looygina. Suuna bolowo hin wiya, asi hin mbuɗ ndaana. Asi hin tin saarasi ni kay Yawe.

⁵ Furira ka kay sa ma tin saa mamba kay Yawena, ka hoŋ irim eg dla coraɗi, ka hoŋ irim eg suu kaboynaɗina lay.

⁶ Yawe, Loonna, sa ma ŋga u aŋ kaɗi, aŋ tak dlaaŋga mbuɗ mbuɗta ki cocoo. An li a ndumuɗ lay ni, ka ndakgi, kay ndaɗ bolow cocoo.

⁷ Aŋ ka minni ɓivunna u ɦalla ɦawaraɗi, aŋ ka minni ɓivun ma ŋgal kinaɗi lay. Aŋ tinin humba kan a hum boyna.

⁸ Kay ndaɗta an di ana, «An wanni magaa maŋga ka takan u gaɗta kiyo.

⁹ Loonna an min lini dlara aŋ miniɗta, gaɗ maŋga an ŋgayaɗ hurun halaŋ.»

¹⁰ Duk suu maŋ suu tokina an ɓak ki kay ɗegee maŋga, ɦawaa, an ka ndak a seŋ vununɗi, Yawe, aŋ lay wiya.

¹¹ An ŋgayaŋ gasi maŋga ka ki hurunɗi, an ka di ki kay suɗ maŋga u gasi maŋga tew tew. Duk suu maŋ suu tokina an seŋ tan kaɗi.

¹² Aŋ, Yawe, aŋ ka tuɗ jivi maŋga ki egen dayɗi, ɗegee maŋga u gasi maŋga ka ŋgomon tew tew.

¹³ Lassa ŋguyun yan kiyo ka ndumbi, coonda halaŋ tokŋi kanu, irin ka wi oloɗi lay. Coonda ndumuɗ su tlimiɗ yamba, saa manda ka oloɗi.

¹⁴ Yawe, aŋ buɗun ki na buɗge, Yawe mbay na zak njununu.

¹⁵ Suu halan iiri manda, aŋ mbuɗusi zolona, suu hal a can kina hoŋ dagan u zolona. U suu ka san un hu wihaw mandana lay, aŋ hoŋosi dagani.

¹⁶ Suu san un ana, «Ha! Ha!» na. Asi halaŋ mbuɗ zolona.

¹⁷ Suu ka halaŋŋa halaŋ, Yawe, aŋ oyosi u furira. Ko suu min suɗ maŋga vunusi a ndi kaŋga kay ŋgara ŋgaaŋ ana, «Bu Suuna dlam ŋgolora» ɗi.

¹⁸ Anni sa ma hawi, yan hoŋi gaa, Bu Suuna saa ay kanu. Aŋŋi sa njununna u ma buɗun kina, Loonna mbay zak vi yaŋ ayɗi.