SOOLLA 39 - Boy Lonana

Cenda vi sa ma ka lasna

¹ Soolla vi sa ma fok suu gi soollana, soolla vi David gaɗ ni Yedutun.

² An di ana, «Hu poy manda ni an ŋgom tanu, ko boy ma co kal ki fununɗi, lini an ŋgaf u sa ma co wa ni, an vi vununu, ka dam boyɗi.»

³ An seŋ tanu hin sa ma halanna ɓaka, na may lassa ka hinin dukgi.

⁴ Hurun ŋgalan hurun ko kura na, hu li ma an oyna ko ku ka ŋgali hurun na. Boyna hin kal ay ki funun ana,

⁵ Yawe takan buu manna, an hin miɗni saɓage? Hinin a an wi ki ana, sa warna buu mamma ka kay ndaŋgara ŋgolɗi.

⁶ Aŋ ŋgaan fiyek buu manna ni ko teŋel kona ɦawa na. Kak man ma kay ndaŋgarana ni ko va kaɗira na. Na daŋ may suu war suu saɓakŋa halaŋŋi ko semeɗna ɦawa na.

⁷ Sana ni ko va ma ɦawana na. Nam ka loɓ tammi ɦawaa. Nam ka tok yam begera, may ka wi sa ma hin bas bege ndaɗta kanaɗi lay.

⁸ Ҥi, Bu Suuna, cemi ni an juɓmi mege? An tin saa manda halaŋŋi kaŋu.

⁹ Buɗun ki ko dla coonda halaŋ, hinin a suu puluɗina ŋgulunɗi.

¹⁰ An dug vunun wa, an ka malam ki oloɗi, kay an hin dlara halaŋŋi koŋu.

¹¹ Aŋ hinin cira aŋ canda na hin ge, an hini tok a miɗna ko koŋ ma buuri kan nekŋa.

¹² Hu li ma aŋ kaɓakŋa kay cora ni aŋ gaɗ ni sana, aŋ ɓeŋem dlara nam miniɗta ki, ko njuful ma ti vuɗ tlena na. Na daŋ may sa warna ni ko semeɗna na.

¹³ Yawe humun tii manna u cen manda haa, ŋgel humuŋ kiɗi, wan simi manna. Kay an iriŋŋi ko koyna ɦawa na, ni ko somoyon na may.

¹⁴ Golon u iriŋga yara oloɗi, hinin an san ki jew nde, hu li ma an tuɗ hu liin ma ba kina.