SOOLLA 38 - Boy Lonana

Cenda vi sa ma ka lasna

¹ Soolla vi David kay gi humba.

² Yawe, hu li ma huruŋ ɓeŋ egenna, kaan ɓakŋa kanɗi. Lini huruŋ ɓeŋ egen lay, waɗan u huruŋ ma yaraɗi.

³ Mbuuru maŋga van wa, koŋ ka tini ni kanu.

⁴ Tan ka ki faniɗi, ni ko yaaŋga, sokon ki tuguɗii halaŋŋi ko coonda.

⁵ Kay coonda su ki saɓaki kanu, ndaɗ kan nekka ko an tli va ma nek kan tlii na.

⁶ Mbilin his cocoo, ka cuɗ loora ni ko dla coonda.

⁷ An goɓi kaŋga tew tew, saɓakan kaɗi, an basaɗa ni u tiina tew tew.

⁸ Hurun ŋgalan ki ko kura na, tan ka ki na faniɗi.

⁹ An mbuɗ ki maŋiya, saɓakan kaɗi, hurun yoo cocoo, an kak u zamba tew tew.

¹⁰ Bu Suuna aŋ wi va ma an minimma lay, aŋ ka humun zam manda ha lay.

¹¹ Mukulun ka duu cocoo, eŋen kaɗi, irin ka wi oloɗi lay.

¹² Banayan suu tuɗ u anna, mbuɗ ŋgay ko mbil manna, ndarayanna mbuɗ col ha ki egen na day.

¹³ Suu halan iiri manda, gun bay masina ki fokon wa, suu san unna ɓakŋi dlara a baan kira sasak, asi tumun un hu buuna tew tew.

¹⁴ An may ni ko suu ŋgelina na ka humbi, anni sa ma ndumu ma vunum ka ɓakgina.

¹⁵ Anni sa ma humum ka humbina, u sa ma vunum ka hoŋ njaɗ kiɗina.

¹⁶ An tin saa manda ni kaŋu, Yawe, aŋ hin hoŋon dira, Bu Suuna, Loonna.

¹⁷ Hin suu duu u anna a furi kanɗi, hinisi asi fan hu li ma sen daɓmaɗi.

¹⁸ An hin tok a ndi kaŋgara, kay lassa ka lan cocoo.

¹⁹ Na daŋ may an di coonda kiyo, dla coonda lan tan ndaana ɦay.

²⁰ Suu gonok mansina saɓaki, asi bolow cocoo, ni suu ka halan bay uɗna.

²¹ Ni suu hoŋon cora kay jivira, yakan kay dlara jivira an ka laɗta.

²² Yawe, noyon kiɗi. Loonna kak ha ki egen dayɗi.

²³ Mbay zak, njun unu! Aŋ Bu Suuna ma suɗunna.