SOOLLA 37 - Boy Lonana

Li ma suu jivina u suu cona tuɗ huna

¹ Soolla vi David. Ɓeŋ huruŋ eg suu li dla cora gawɗi, suu ci maɗna aŋ mbuɗ yara egesiɗi.

² Kay asi hin so ki ni ko ndal usuna na. Asi hin yak ki ni ko hum bubura na.

³ Ҥal taŋ ko Yawe, li jivira, kay a kak hu mbas maŋga, a nam goloŋ may.

⁴ Hal furi maŋga ni ko Yawe, nam hin ɦaŋ tlesuu huruŋ minisina bel.

⁵ Tuɗ iriŋ eg Yawe na ɗow, tin saa maŋga kamu, nam wiya.

⁶ Nam hin takaŋ ɗegee maŋga ki ko kiɗikkana, dlaaŋga jivira hin tak ki ko kiɗik faɗta na.

⁷ Kak na en eg Yawe, saa ni kamu, ɓeŋ huruŋ eg sa ma ka finaɗi, eg sa ma li dlara u mbambaraɗi lay.

⁸ Hin yara kiyo, hin huu ma ɓeŋ ɦay ɦayna ki may. Mbuɗ yaɗi, dla ndaɗta tuɗuŋŋi hu cora.

⁹ Suu li dla cora halaŋ hin dikisi kiyo, suu ka juɓ Yawena hin ti mbassa ni asiya.

¹⁰ Kak ew ni suu li dla cora ka oloɗi, aŋ golosi liisina ni sa ka hu dewɗi.

¹¹ Na may suu hoŋ yasi gana mbassa ni masira. Asi hin lak u heɓpa gasira.

¹² Sa ma cona hal yalna kay suu jivina, nam muɗ seem egesiya.

¹³ Na may Bu Suuna ka san umu, kay nam wi ana buurum hin tok.

¹⁴ Suu cona ka guu si ŋgew masina, gun mbuuru masira a ci sa ma ka ŋga tambina, u sa ma hawra kiyo.

¹⁵ Ŋgew masina hin cokosi ni tasira tok, mbuuru masira hin kus kiyo.

¹⁶ Va ma ka ko sa ma ɗegeena ewna, su begera ko sana moli faɗ u ɦarambara.

¹⁷ Kay ko suu li dla cora hin kus kiyo, na may Yawe ka njun u suu ɗegeena.

¹⁸ Yawe ka ŋgom iirira vi suu ɗegeena, liisi ma kakŋa ka tew tew a fafaɗta.

¹⁹ Hu li ma lassa mbana va ka lasiɗi, hu li ma may ŋgolla ndina asi hin hoɓa.

²⁰ Suu gonokka u Bu Suunana hin ba kiyo, tlegeyesi suu jivina halaŋ hin ŋgal ki ko usuna na.

²¹ Sa ma cona tli balna, may ka warakam kiɗi, may sa ɗegeena wi hahaw suuna, ɦasi balna ha kasi may.

²² Na daŋ may suu nam paɗ vunum ki kasina, mbassa hini masira, suu nam gasi vunana hin ba kiyo.

²³ Gi deɓ Yawe kay nam ka gol sem sana ma tuɗta, voɗta vi sa namma irim jiviya.

²⁴ Lini sem daɓ va lay, nam ka puk gaɗi, kay Yawe vam kom koloo.

²⁵ An ay u zoŋ tanu, cemi an mbuɗ ki maari, an wi sa ma ɗegee ma Lona noyom ki kaɗi, goryom ka tuɗ a saa va ma ti ki vi saɗi lay.

²⁶ Hu buuna halaŋ sa ma ɗegeena ka wi hahaw suuna, nam ɦal tlena kay suuna, njaf mamma halaŋ vunna ki paɗi kasiya.

²⁷ Hin dla cora kiyo, li dlara jivira, ni aŋ hin fi liiŋ ma buuna tew tew.

²⁸ Kay Yawe minni suu boyosi ɗegeena, nam ka hin suu mam suu ɗegeena kiɗi. Nam ka golosi tew tew, may suu li dla cora njafasi bulum kiyo.

²⁹ Suu ɗegeena mbassa ni masira, asi hin lak huruɗ a fafaɗta.

³⁰ Vun sa ma ɗegeena di ni boy ma nera, sinim njaɗ ni dlara ɗegeera.

³¹ Gaɗta vi Loommara ka hurumu, sem ka daɓ va ma coɗi.

³² Suu cona ka juɓ u suu ɗegeena, halasi ni a casi kira.

³³ Na may Yawe ka hinisisina kasiɗi, nam ka hin a kaɓakŋa kay sa ma ɗegeenaɗi.

³⁴ Juɓ Yawe, col hu voɗ mamba, nam hin ɦaŋ saɓakŋa a kak mulna kay mbassa, aŋ hin wi suu cona ki dikiya.

³⁵ An wi sa ma cona dew tli tam koloo, col tam ki eŋga ko guna na.

³⁶ An hoŋ ay a mbara ni nam kaɗi, an halam lay ni ka fam oloɗi.

³⁷ Gol taŋ jiviya sa ma ɗegeena, gola sa ma hurum ki jivina, sa ma hal heɓpa njafam hin hin kaa.

³⁸ Na may suu hurusi gonokka, njafasi hin ndi ki u tasira halaŋ.

³⁹ Suɗta vi suu ɗegeena col ay ni ko Yawe, nammi sa ma ka njunusi hu dlara fasira.

⁴⁰ Yawe njunusiya, buɗusi ki lay, nam buɗusi ki ko suu cona, suɗusi kiyo, kay asi ŋgay tasi ni egemu.