SOOLLA 36 - Boy Lonana

Minda vi Lonara tak taɗ kiyo

¹ Soolla vi sa ma fok suu gi soollana, soolla vi David sa ma sun Lonana.

² Humun gan kay boy ma vi sa ma ka wi Lonaɗina, nam ka wi ana li ndaa Lona ni jiviya naɗi.

³ Nam maa ki kay dla coomba, nam saa ana Lona ka wam coombaɗi.

⁴ Dlara kal ay ki funumba halaŋŋi ganyamba, nam maa ki kay a li dlara jivira.

⁵ Kay lay mam ma buuna lay ni nam saa ni dla cora, nam tuɗ ni hu voɗta cora, nam ka hin dla cora kiɗi.

⁶ Yawe, jivi maŋga tew ta ta huulona, ɗegee maŋga tew ta ta eg ɗugulla.

⁷ Ɗegee maŋga ni ko ɦinira vi Yawera na, ɓak ma aŋ kaamma ni ko zul ŋgolla na. Yawe aŋ suɗ suu warna u yoorina.

⁸ Lona, ɗegee maŋga su ki kan cocoo, suu warna halaŋ ŋgay tasi ni u garaŋaŋu.

⁹ Asi hoɓ u ti ma jivi ma ha hu ziiŋŋa, aŋ ɦasi mbo maŋ ma jivina.

¹⁰ Kay mbo ma iirina ka ni varaŋu, u kiɗik maŋga ami ka wi lina ki kiɗik.

¹¹ Ҥuɗ jivi maŋga fok kay suu ka waŋŋa, li ɗegee maŋga kay suu hurusi ɗegeena.

¹² Ka hin sem suu ŋga tasina tew egenɗi, ka hin ko suu cona a dikin kiɗi.

¹³ Tani suu li dla cora halaŋ cuk wa kaŋgaa. Asi ka ndak a yow kolo oloɗi.