SOOLLA 35 - Boy Lonana

Cenda kay njunda

¹ Soolla vi David. Ҥi, Yawe, vi suu ka yakanna, suu hal a canna aŋ casi may.

² Tli mbarina u koroŋ maŋŋa koŋu, mbay njununu, col koloo doo kanu.

³ Tli saɓ maŋga koŋu, col ki voɗ suu halanna, dan ana, «Aŋŋi sa suɗunna.»

⁴ Ko suu halanna puk ki gaa, viɗ kiyo. Suu hal a baan iiri mandana, mbuɗ zolona, hoŋ ki dagani.

⁵ Asi mbuɗ ko ndal barra semeɗna siiriɗ kira na, hu li ma sa sunda vi Yawena ka dikisina.

⁶ Ko voɗ masira mbuɗ ki ndufunu u dlaaɗaɗta lay, hu li ma sa sunda vi Yawe ka dikisina.

⁷ Asi vegen zulla fokonni bay u boyna, asi gun bayna u zulla ni bay u boyna.

⁸ Ko lassa mba kasi bay asi waɗu, ko bay ma asi gunumma hoŋ vasiya, asi cuk hu hahaw ndaɗta may.

⁹ An may ni li furira coco kay Yawe, an furi cocoo kay an suɗ ki wa.

¹⁰ Tanda halaŋ ka di ana, «Yawe, sa ma ko aŋ nana ni gege? Aŋ suɗ sana ki ko ndaram ma saɓak suumma, suɗum ki ko suu hal a yowom tlegeyem kina.»

¹¹ Suu di dlara kaboyna yow kolo wa, asi joɓon kay dlara an ka waɗɗira.

¹² Asi hoŋon cora kay jivira, an hin ki ni kay tan dew.

¹³ Hu lima asi ka tuguɗiiyo ni an cuk tanni baraw bolna, an hoŋ yan gaa, li laara, an cen kasi may.

¹⁴ Ni ko kay bananna ɗowba wayanna na, an ka tuɗa, hoŋ ay tew tew. Ko sana a li hahaw sumba na an tuɗ u hahawra.

¹⁵ Hu li ma an puk kaŋga wa ni, asi halaŋ furiya, suu gugufura tok tasi kan halaŋ a pananda. An ka wi dlara asi lan kaɗtaɗi lay, asi ka kak dukgi kay lasanda gak gak.

¹⁶ Hu li ma asi wan hu lassana, asi san un cocoo. Asi ka lasan cocoo.

¹⁷ Bu Suuna aŋ ka gol boy namma ni ana mege? Suɗun ki ko suu co asina suɗ ge, asi ŋguyun yan ki ko dlona na.

¹⁸ An may ni hin gaŋ deɓ hu tokka ŋgolla, duk suu molina an hin geleɗeŋu.

¹⁹ Hinin a suu babali mansina a furi kan hu li ma an puk kaŋganaɗi. Suu babali mansina taɗ yasi un bay u boyna.

²⁰ Funusi ni dlara heɓ ka huɗi, asi ki gonokka u suu laki en hu mbassana, asi halni dlara cuk suuna kel tasira.

²¹ Vunusi ki ŋgooyra na ɦoŋ kanu, asi di ana, «Ҥa! Ҥa! Irimi wam wa.»

²² Aŋ wi wa may, Yawe, ŋgel humuŋ kiɗi, Bu Suuna, tuɗ ki egen dayɗi.

²³ Dliɗ ki koloo, col kolo njun kanu. Dlaanda u ɗegee manda, Loonna u Bu Suuna manna waɗ aya.

²⁴ U ɗegee maŋga doo kanu, Yawe, Loonna, hinin a asi furi kanɗi.

²⁵ Hin a asi di ana, «Ҥa! Ҥa! ami gam funumi ni na dew ɦawaa.» Hinisi a asi di ana, «Ami likim ki wa.» naɗi lay.

²⁶ Hinisi asi halaŋ mbuɗ zolona, suu furi kay las mandana halaŋ. Suu asina hinisi zolona tok kasiya, u suu hal a su kanna halaŋ.

²⁷ Suu ɗoɓon dlara ɗegeera kanna hin furiya, asi ɓak tew tew ana, «Yawe su kasi wa. Nam min a li jivira kay saam ma sunda.»

²⁸ Na ɗaŋgi, sinin hin di ki ni ɗegee maŋga, an hin ŋgaaŋ hu buuna halaŋ.