SOOLLA 34 - Boy Lonana

Gi deɓpa maŋ Lona kay suɗta

¹ Soolla vi David, nam mbuɗ tam fok Abimelek ko sa ma puluɗina na. Nam dikimu, David tuɗ may. Ŋgoo dagan David hin gi sool ndaɗta ni na.

² An gi deɓ Yawe tew tew, an ka hin deɓpa an gambara kiɗi.

³ Hurun furi kay Yawe cocoo, suu hoŋ yasi gana furiya hu li ma an ka gi soolla.

⁴ Mbaagi ay ŋgaaygi Yawe, geleɗeygi semu ko taygiya.

⁵ An cen Yawe, nam humun wa, nam suɗun ki hu ndaa manna halaŋ.

⁶ Suu mbuɗ irisi egemma halaŋ ka furiya, nam ka hinisi a mbuɗ zoloɗi.

⁷ Sa ma wihawra yamu, Yawe humum may, suɗum ki hu hahaw mamba.

⁸ Sa sunda vi Yawe ka kaki eg suu lam ndaaramma, nam buɗusi kiyo.

⁹ Gologi gige Yawe jivi cocoo, furira ka kay sa ma ŋgay tam egemma.

¹⁰ Lagi ndaa Yawe agi suu mamsina, suu li ndaa umma, va ma hin bay asi fam kaɗi.

¹¹ Dlona lay ni buu u vunumu, mayra cam lay. May suu hal Yawena, va ka kaɗak kasiɗi.

¹² Agi gorkemba mbaagi aya, an min haɗagi ndaa ma lam u Yawena.

¹³ Sa ma min iirira ni gege? Sa ma min buu ma ŋgolna a kak jivina ni gege?

¹⁴ Sa namma ŋgom sinim jiviya, gol vunum ma di boy ma cona may.

¹⁵ Hin dla cora kiyo, li ni dlara jivira, hal a li ni heɓpa duk suuna.

¹⁶ Ii Yawe ka cuki kay suu ɗegeena, humum ka tini a humusi tii masina.

¹⁷ Yawe duu u suu li dla cora, nam bulumusi sesi ki hu duliyara.

¹⁸ Asi ka sawalla, Yawe huma, nam suɗusi ki hu las masira.

¹⁹ Yawe ka tok eg suu hurusi ka haɗ kay coosirana, nam suɗ suu ka yoo tasi hurusi kurufuna.

²⁰ Suu ɗegeena ka las cocoo, hu buuna tew tew Yawe ka buɗusi kiyo.

²¹ Bu Suuna ka golosi tew tew. Sok maa dew lay ka kus kiɗi.

²² Lassa ndak ci suu cona kiyo. Suu ka min ɗegeeraɗina ɓakŋa kaay kasiya.

²³ Yawe suɗ iirira vi suu sun mamsina kiyo. Suu ŋgay tasi egemma halaŋ sa ma ba ki kaɗi.