SOOLLA 33 - Boy Lonana

Ŋga Lona ma li tlena Belna

¹ Agi suu ɗegeena ŋgaagi Yawe, geleɗta ni maŋ suu hurusi ɗegeena daŋ may.

² Gagi deɓ Yawe u diŋŋa, geleɗam u diŋ ma zewem doogona.

³ Gagina soolla wilira, cagi tlena jivi kay a ŋgaamu.

⁴ Kay boy ma vi Yawena ɗegee, sun mamba halaŋŋi gasi.

⁵ Nam minni gasira u ɓak ma ɗegeena, yam ndaŋgara halaŋ ki oy u ɗegee Yawera.

⁶ Yawe li huulona ni u boy mamma, u tlesuu huulona halaŋŋi u Musuk ma kal ay ki funumma.

⁷ Nam tok yam mbona ki hu lina dew, mbo lum ŋgolna nam tokom ki hu li ma dewna.

⁸ Duliyara halaŋ li ndaa Yawe, suu hu duliyarana halaŋ lam ndaaramu.

⁹ Nam di ana duliyara liya, ndaɗ li may. Nam ka ŋgomoɗ ni namu, ndaɗ ka gak gak.

¹⁰ Yawe, bulum dlara vi njaf suu warna kiyo, dlara suuna saa gin a laɗta nam bulumuɗ kiyo.

¹¹ Dlara Yawe ŋgaaɗ na ŋgara ndaɗ kak na gak gak, saa mamba kak na din din, ka daɓ kiɗi.

¹² Furira ka kay suu vi Yawe a Loosinana, furira ka kay suu Yawe manasi a suu mamsinana.

¹³ Ay kolo huulona Yawe ka gol aya, nam wi suu warna ay ki halaŋ.

¹⁴ Hu li ma nam kaki huna, nam ka gol suu kay ndaŋgarana ay halaŋ,

¹⁵ nam lasi ni u huu ma dewna, nam ka golosi sun masira halaŋ.

¹⁶ Mul ma ndak a suɗ ki kay suu mam suu duuna ŋgolna kaɗi, sa ma saɓak coco ma ndak a suɗ tam ki kay tam kaɗi.

¹⁷ Saɓak kulumma ka ndak a suɗ saɗi, tlesuu saɓakasi cocona halaŋ ka suɗ saɗi.

¹⁸ May Yawe ka juɓ u suu lam ndaaramma, u suu tin hurusi kay ɗegee mambana.

¹⁹ Nam suɗusi ki fun miɗna, golosi hu li ma may ŋgolla ndina.

²⁰ Aygi may ni juɓuygi ni Yawe, nammi sa ma njunuygina, ni mbari maygina may.

²¹ Furira huruygira col ay ni komu, saa maygira tini ni kay sem ma teteɗna.

²² Yawe ko ɗegee maŋga li kamiya, kay hurumi halaŋ tini ni kaŋu.