SOOLLA 32 - Boy Lonana

Furira kay cora bulum kiwa

¹ Soolla haɗta vi David. Furira ka kay sa ma coomba bulum kina, suluk mamma yam baa ki wa.

² Furira ka kay sa ma Yawe ka ndumum coomba oloɗina, dlara co ka hurum oloɗi.

³ Hu li ma an bay tak coonda ki tuna, tliwin mbuɗ ki maŋiya, an kak u zamba buuna tew tew.

⁴ Njeŋge lay, faali lay, koŋ ka buuri kan nekka, saɓakan daɓ ki ko ndal laara caŋ hu til faɗtara na.

⁵ An daŋ dla coonda ki halaŋ, an ŋgay coon taa ka kiɗi. An di ana, «An hom coonda ki fok Bu Suuna», aŋ tlan nek coonda ki kan wa.

⁶ Ni na suu ɗegeena halaŋ ka ceneŋu, hu li ma nam ŋgaf u aŋŋa. Lini mbona tli coco lay, nam ka lam vaɗi.

⁷ Aŋŋi ŋgus ma kanna, aŋ ka ŋgayan ki ko yoora. Aŋ ŋguyun yan u soolla furira ta buɗun kira.

⁸ An tuɗ ha haɗaŋu, takaŋ voɗta tuɗta, an ɦaŋ gaɗta, saa kaŋ tew tew.

⁹ Li taŋ ko kulumina u koro Makkana suu saarasi kaɗina naɗi, asi suu njamara u njalaŋŋa ka gaɗasina, asi ka wi vaɗi lay.

¹⁰ Suu li dla cora lassa mba kasi cocoo, na may dlara ɗegeera ka cuɗ u sa ma hin tam ko Yawena.

¹¹ Furiyugi u Yawe, agi suu ɗegeena, furiyugi, sawalla koloo agi suu hurugi ɗegeena.