SOOLLA 31 - Boy Lonana

Cen mayra hin taŋ ko Lonara

¹ Soolla vi sa ma fok suu gi soollana, soolla vi David.

² Yawe, an hal li ma ŋgayna ni egeŋu, hinin a babali mansina mbuɗun zoloɗi. Buɗun kiyo kay aŋŋi sa ma ɗegeena.

³ Gi humuŋ ay ga egenu, mbay zak, buɗun kiyo. Aŋ li a ɦini man ma saɓakŋa, ɦoŋzi ma saɓak manna a suɗun kira.

⁴ Gasi aŋŋi ɦini manna u ɦoŋziin ma saɓakŋa, kay a geleɗeŋ seŋga an tuɗ uŋu, aŋ takan voɗta.

⁵ Aŋ fuɗun ki ko bay ma guni fokonna, kay saɓak manna col ay ni koŋu.

⁶ An hin musukunni hu duk koŋu, aŋ gusun ay ki wa, Yawe, aŋŋi Lo ma gasina.

⁷ An mbuɗ ŋgoron maŋ suu goɓ loogi suu hawana. An hin tanni koŋu, Yawe.

⁸ An luu ni luu ma furira kay ɗegee maŋga, kay aŋ wan hahaw manda wa, aŋ saa kay las manda.

⁹ Aŋ hinin ka ko saan ma babaliɗi lay, aŋ colon sen ki hu li ma jivina.

¹⁰ Wan hahawanu, Yawe, an ka hu yoora, irin ka cim ki ko tiina, an ka hu lassa ni tliwin u iiri manda halaŋ.

¹¹ Iiri manda daɓ ni u yoora, basa manda daɓ ni u zamba. Hu li ma an li cora, saɓakan ka oloɗi, sokon ki kusiya.

¹² Suu babali mansina ka ŋgulun halaŋ, suu vok ziinna ka ŋgulun lay, an li ndaa ko banayanna lay. Asi wan wa ni ŋgay tasi kiyo.

¹³ Asi maaran ki ko sa ma ki miɗina na, anni ko tlesuu cukusi ki del buɗna na.

¹⁴ An hum dla cora suuna daɗta cocoo, dlara laŋ ndaana, ŋguyun yan kina cutl. Asi dlaɓ vunusi halaŋŋi kanu, asi vi vunusi a baanni iiri manda.

¹⁵ An may ni an ɦal tanni koŋu, Yawe, an di ana, «Aŋŋi Loonna.»

¹⁶ Buu manna halaŋŋi hu duk koŋu. Ɓaɗan ki ko suu babali mansina u suu lasanna.

¹⁷ Hin kiɗik maŋga li kay saaŋ ma sunda, suɗun ki ni u jivi maŋga.

¹⁸ Yawe hu li ma an ka yaŋŋa, hinin a mbuɗ zoloɗi. May suu ka waŋ aŋ Lonɗina mbuɗ zolona, seŋesi vunusi, ha ki hu lina vi suu miɗina.

¹⁹ Suu pan suuna u ŋga tasina vunusi ma kaboyna mbuɗ ki ndumu wa, vunusi ma ɓak dla cora eg suu ɗegeena.

²⁰ Jivira aŋ ŋgomoɗ ha kay suu laŋ ndaaraŋŋa ndaɗ ŋgol cocoo. Aŋ laɗ maŋ suu ŋgay tasi egeŋŋa ki fok suuna halaŋ.

²¹ Aŋ ŋgayasi ki hu li ma aŋ ka huna, ha ki day eg suu las suuna. Aŋ kuluɓ ŋgusuŋ ki kasi ko boy ma vi suunana.

²² Gi deɓ Yawe kay ɗegee mamba lan dlara mbuɗ mbuɗta kanu, hu li ma suu duu u anna ŋguyunna.

²³ Hu li ma an viɗ ki nana, an saa ana aŋ hinin ki wa. Na may aŋ humun delenda cendawa hu li ma an ka yaŋŋa.

²⁴ Agi suu ɗegeena minigi Yawe, Yawe ŋgom suu tin hurusi kamma. Suu ŋga tasina, nam kaasi ɓak ma cona kasiya.

²⁵ Lakagi saɓaki, vagi tagiya agi suu tin saa magira kay Yawena halaŋ.