SOOLLA 30 - Boy Lonana

Gi deɓpa kay suɗta

¹ Soolla vi David kay a mal vun Ziŋ Lonara.

² An ŋgaaŋu, Yawe, kay aŋ paɗan ay ki hu zulla. Aŋ hinin suu babali mansina ka a su kanɗi.

³ Yawe Loonna, an tii egeŋu. Aŋ garaɗan ki wa.

⁴ Yawe, aŋ paɗan ay ki duk suu miɗina, aŋ hoŋon iiri olo hu li ma an ndi ga hu zullana.

⁵ Agi suu ɗegeena ŋgaagi Yawe, geleɗemu takam sem ma teteɗna kiyo.

⁶ Yaŋ Lonara ka kak ta taɗi may, oo mamba kak ta ta hu iirira. Fiɗigi ni tiina hu zina, vin maɗiira ni soolla furira may.

⁷ Anu an kak en di tan ana, «An hin kak eŋe, ka geŋeɗɗi,

⁸ Yawe an kaki saɓakŋa ni uŋu.» Hu li ma aŋ ŋgay taŋ ki irinna, an mbuɗ ki ndaana.

⁹ Yawe, an yaŋ ha ni aŋu, Loonna, an joɓoŋu aŋ njununu.

¹⁰ An miɗ ki wa ni va ma aŋ fam huna ni mege? Ndaŋgara ndak a gaŋ deɓ olo su? Ndaɗ hin ndak a takaŋ jivi maŋga ki su?

¹¹ Humunu, Yawe, wan hahawanu. Yawe, mbay njununu.

¹² Aŋ mbuɗun yoo manda ki furira. Mbuɗun baraw bol manna ki u baraw ma luuna.

¹³ Kay ndaɗta an ka gi soolla furira tew tew. Yawe, Loonna, an min geleɗeŋ tew tewe.