SOOLLA 29 - Boy Lonana

Del Yawe

¹ Soolla vi David. Agi suu sunda huulona, ŋgaagi Yawe, ŋga Yawe ŋgol mamba bibiŋilla.

² Geleɗegi sem Yawe, goɓogi ga fok Yawe. Goɓogi gaa fok Yawe hu li ma teteɗ mamba tak taɗ kina.

³ Del Yawe su ki kolo kay mbona, Lo ma bibiŋilna ka bay delemu, Yawe ti mul kay mbona halaŋ.

⁴ Del Yawe ka bay u saɓakŋa, ka takam ŋgol mamba kiyo.

⁵ Del Yawe kus guna kiyo, gu ma eŋ cocona, guna kay yam ɦinira Libanda lay.

⁶ Nam mbuɗ ɦinira Libanda weɗ kolo ko gor mbutlina na, ɦinira Hermonda ko goo vunda na.

⁷ Del Yawe njay kura ay ki kiɗiki.

⁸ Del Yawe dlak ŋgoora ki lay, Yawe dlak ŋgoora Kadessa ki lay.

⁹ Del Yawe vuɗ dukka ki bay tiliɗ ma vuɗta ndakka. Ndaɗ yak hum ŋgusi suu ŋgoo bagina ki halaŋ. Hu Ziŋ Lonara tlesuu huna halaŋ ka ŋgaamu.

¹⁰ Yawe kak mulna kay mbo lumma, Yawe ni mul ma din dinna.

¹¹ Yawe ɦal saɓakŋa maŋ suu mamsina, Yawe paɗ vunum ki kasiya, ɦasi tara fanira lay.