SOOLLA 27 - Boy Lonana

Yawe ni kiɗik manda u suɗ manda

¹ Soolla vi David. Yawe ni kiɗik manda u suɗ manda, an li ndaana ni ko ge ologe? Yawe ni ɦoŋzi ma saɓakŋa vi iiri manda, an dlak ndaana ni ko ge ologe?

² Lini suu li dla cora tok kanu, lini suu duu u anna hal a can kiyo, asi hin daɓ sesiya, puk kaŋgaa.

³ Lini suu duuna ŋguyun yan lay, an ka li ndaaɗi. Lini suuna ka duu u an lay hurun ka mbuɗ ndaaɗi.

⁴ An joɓ Yawe kay va dew, ni an kak hu Ziŋ Yawera, hu buu ma iiri manda halaŋ, a gol jivira vi Yawera, golom Ziimba jivi may.

⁵ Nam ka njun kan hu li ma lassa fanna, nam ŋgayan hu ziimba, nam colon ki kolo kay yam ɦinira.

⁶ Cemi ni yan ki tli koloo, kay suu babali man suu ŋguyunna halaŋ. An li ɓivunna hu ziimba ni u soolla furira, gi soolla maŋ Yawe.

⁷ Yawe, humun yiinda an ka yaŋga, wan hahawanu, hoŋon dira.

⁸ An saa ni kay Boy maŋŋa, «Aŋ halanu.» An ka halaŋŋi aŋ may, Yawe.

⁹ Ŋgay taŋ ki irinɗi, dikin ki u huruŋ ma yaraɗi. Aŋŋi sa ma njununna, hinin kiɗi, Lo manna, saan ma suɗta.

¹⁰ Lini gi bun u sun hinin ki lay, aŋ, Yawe, ka hinin kiɗi.

¹¹ Takan voɗ maŋga, Yawe, tinin irin hu voɗta jivira, kay suu gonok mansina ka halanu.

¹² Ҥan ki ko suu duu u annaɗi, suu di dlara kaboyna yow kolo wa, asi ka di dla cora u sen tew tew.

¹³ An wi ki gasi ana an hin kak iiriya, an hin wi tlesuu jivi suu vi Yawena wi li ma suu iirina ka huna.

¹⁴ Juɓ Yawe, kak saɓagi, li ndaaɗi. Juɓ Yawe.