SOOLLA 25 - Boy Lonana

Cenda kay ɦalla, vaɗ huuna u ŋgomba

¹ Soolla vi David. Yawe, saa manda halaŋ halaŋŋi aŋu.

² Loonna, an saa ni kaŋ dew, mbuɗun zoloɗi. Hin a suu babali mansina su kanɗi.

³ Suu tin hurusi ka juɓuŋŋa halaŋ ka mbuɗ zoloɗi. May suu babali maŋsina halaŋ mbuɗ zolona, hoŋ u kosi ma vadlna.

⁴ Takan voɗ maŋga, Yawe, haɗan a an waŋ voɗ maŋga.

⁵ Haɗan a an waŋ gasi maŋga, kay aŋŋi Lo ma suɗunna. An ka juɓuŋ hu buuna halaŋ.

⁶ Yawe humuŋ gaŋ kay oo maŋga, u ɗegee maŋga aŋ laɗ ay fok jew dayra.

⁷ Saa kay dla coonda an laɗ ay hu zoŋ tandaɗi, saa kanni hu ɗegee maŋga hol, ni kay jivi maŋga, Yawe.

⁸ Yawe jiviya, nam ɗegee, nam tak voɗta maŋ suu li dla cora.

⁹ Nam tuɗ suu ka ŋga tasiɗina hu voɗta ɗegeera, tak voɗ mamba maŋ suu hoŋ yasi gana.

¹⁰ Haɗta vi Yawera halaŋŋi ɗegee, gasi lay, kay suu li u galam mamba u gaɗ mambana.

¹¹ Yawe aŋŋi sa ma ndakina, bulumun coonda ŋgol cocora kiyo.

¹² Suu li ndaa Yawena halaŋ, nam takasi voɗta asi tuɗ hura.

¹³ Asi lakŋi u furira, goryosi hin ti mbassa ni asiya.

¹⁴ Yawe ɦal tam maŋ suu lam ndaaramma, nam takasi galam mamba may.

¹⁵ An gol irin tew tew ni eg Yawe, kay nam fuɗun sen ki ko bay ma vanna.

¹⁶ Mbuɗ iriŋ ay egenu, wan hahawanu, kay anni kay degenu, hoŋ ki ga coco lay.

¹⁷ Wihaw manda su ki kanu, suɗun ki ko las manda.

¹⁸ Golon hahaw manda u las manda, bulumun dla coonda ki halaŋ.

¹⁹ Gola, suu babali mansina bolow cocoo, gonok masira u las masira su ki kanu.

²⁰ Golon iiri manda suɗun kiyo, kay an ŋgay tanni egeŋu, mbuɗun zolo fok suu ka halannaɗi.

²¹ Ɗegee manda u jivi manda golonu, kay an tin saa manda ni kaŋ dew.

²² Ҥi, Lona, buɗ suu Israelna kiyo, buɗusi ki ko las masira halaŋ.