SOOLLA 21 - Boy Lonana

Gi deɓ Lona kay nam su kay suuna

¹ Soolla vi sa ma fok suu gi soollana, soolla vi David.

² Yawe, mulna ka furi cocoo kay aŋ ɦam saɓakŋa. Nam furi cocoo kay aŋ ka njunumu.

³ Aŋ ɦam tlesuu nam joɓosina, tlesuu nam minisina halaŋ, aŋ hinim maa ka kiɗi.

⁴ Aŋ ɦam heɓpa, paɗ vunuŋ ki kamu, aŋ kuluɓum jum lorra kamu.

⁵ Nam joɓoŋ kak ma iirina, aŋ ɦamma. Aŋ ɦam buu ma fiyek ma um ka doɗina.

⁶ Saɓak mamma u bibiŋil mamba ɦuɗ fokŋi kaŋ aŋu, aŋ ɦam ŋgolla u bibiŋilla.

⁷ Aŋ paɗ vunuŋ ki kam a fafaɗta, Nam ka furiya kay aŋ ka u namu.

⁸ Na daŋ may mulna tin saaram halaŋŋi kay Yawe, ɗegeera vi Lo ma kolona ɦam eŋga a col saɓaki.

⁹ Aŋ fi suu duu u aŋŋa halaŋ, koŋ ma njufna tin ki kay suu gonok maŋsina halaŋ.

¹⁰ Hu li ma aŋ tak taŋ kina, aŋ hin ŋgalasi ki ko kura na. Hu yaamba Yawe hin likisi kiyo, kura hin ŋgalasi ki halaŋ.

¹¹ Aŋ hin gasi njafasi ki kay ndaŋgara halaŋ, aŋ hin bulumusi deeresi ki duk njaf suu hu duliyarana bel.

¹² Lini asi saa dla cora kaŋ lay, hal dlara di ŋgeŋŋa kaŋ lay ni, asi ka ndakgi.

¹³ Aŋ tinisi mbuuru maŋga kasiya. Asi hoŋ dagan wa.

¹⁴ Col koloo, Yawe, mbay u saɓak maŋŋa. Ami min gi soolla, geleɗeŋ saɓak maŋŋa.