SOOLLA 20 - Boy Lonana

Cenda kay a su kay suu babalira

¹ Soolla vi sa ma fok suu gi soollana, soolla vi David.

² Yawe humuŋ cen maŋga hu buu ma lassa faŋŋa, ko sem Lo ma vi Yakobma njun kaŋu.

³ Ay hu zi ma teteɗna nam sunuŋ njunda aya, ay hu Siyon day ni, nam njunuŋ aya.

⁴ Ko humum gam kay ɦal maŋga, nam vaŋ ɓivun maŋŋa jiviya.

⁵ Nam ɦaŋ tlesuu aŋ minisina, dlara aŋ a laɗta halaŋ nam laŋga kiyo.

⁶ Lona ɦaŋ saɓak ma su kay suuna wa, ni ay mba gam soolla furira. Ay mba ŋgaay sem Lo mayna, ko Yawe vaŋ cen maŋga halaŋ.

⁷ Cemi ni an wi ki wa, Yawe suɗ saam ma nam Fuurumma. Ay hu Ziim ma Teteɗna nam hoŋom dira aya, nam njunum u saɓak kom ma njufna.

⁸ Suu daŋŋa ŋga ni kulumi masi suu pus pusna, suu daŋŋa ŋga tasi kay kulumina, aygi may ni humuygi ka gaygi ni kay sem Lona Yawe maygina.

⁹ Suu asina halaŋ hoŋ dagani, asi puk kaŋgaa, aygi may ni ka coli saɓak tew tew.

¹⁰ Yawe ɦal saɓakŋa maŋ mulna, hu li ma ami ka ceneŋŋa, aŋ humumiya.