SOOLLA 2 - Boy Lonana

Mul ma Lona manamma

¹ Njaf suuna yow vunna kolo eg tasi na ni kay mege? Suuna li dlara bay uɗta na ni amige?

² Muli suu kay ndaŋgarana min tasi a duuna, goryoŋ muli suu ŋgolona taɓ u tasi a duu Yawe u sa ma Lona Fuurumma.

³ Asi di ana, «Njaaygi gaɗ masira asi njunuɗ kaygira kiyo, hiniɗ a ti kaygi oloɗi.»

⁴ May nam ma ay kaki kolo huulona ka san ay usiya, Bu Suuna ka panasiya.

⁵ Nam ɓakasi u hurum ma yara, hu yaamba nam mbuɗusi ki ndaana.

⁶ Nam di ana, «An mbuɗ mul manna ki teteɗ ni anu, tinim kay ɦinira Siyon, ɦini mayra teteɗta ɦini manda.»

⁷ An di gaɗta vi Yawera kiyo. Nam dan ana, «Aŋŋi goronna, karam an vuɗuŋ wa.

⁸ Joɓonu, an hin ɦaŋ njaf suuna a jooŋŋa, vun ndaŋgara daɓ ayra halaŋŋi varaŋu.

⁹ Aŋ hin waɗaɗ ni u tokolo kawina. Aŋ hin tooɗ ki ko suu min doygina to luɓuna kira na.»

¹⁰ Cemi agi mulina humugi jiviya. Agi suu kaɓakŋa kay ndaŋgara, vagi haɗta jiviya.

¹¹ Sunugi Yawe u ndaana, lakagi u furira u tagi dlak ndaana may.

¹² Li Goona jiviya kay nam mbuɗ yaɗi, agi viɗ ki hu voɗtaɗi, kay yaamba hin ay ni na tok daŋ. Furira ka kay suu ŋgay tasi hurumma.