SOOLLA 19 - Boy Lonana

Bibiŋil Lonara hu tlesuu nam lasina, gaɗta vi Yawe

¹ Soolla vi sa ma fok suu gi soollana, soolla vi David.

² Huulona ka tak bibiŋilla vi Lonara, tlesuu kolona halaŋ tak sunda Lona laɗ u komba.

³ Buu ma dewna ka tak ki kay buu ma vinna, njeŋgera dewra ka tak ki kay ta ha fokka.

⁴ Ni ka boy ma sa njaɗam njaɗiɗi, ma ɓiiriɗɗi lay, sa ka hum del saɗi lay,

⁵ dlaamba ndak ki kay yam mbassa halaŋ, boy namma tew ki hu duliyara halaŋ. Lona min ziŋ faɗtana ay kolo huulona,

⁶ ndaɗ kal ay ki ko goona ma ɗum caamba wilina kal ay ki maɗiira na. Ndaɗ tuɗ voɗ maɗta u furira ko sa ma ti suuna ay u njogoɗtana na.

⁷ Ndaɗ col ay u lonara tin ayra, tuɗ ha ki u lonara do ayra, va ma hin ki bay faɗta tam kaɗi.

⁸ Gaɗta vi Yawera ndaɗ pasiyak, ndaɗ ɦal iirira. Dikira vi Yawe sa ndak a li uɗu, ndaɗ mbuɗ sa ma giniŋŋa wi dlara.

⁹ Gaɗta vi Yawera ndaɗ ɗegee, ndaɗ furi huu sa ma li uɗna. Boy Yawena ni gasi nam mal ira kiyo.

¹⁰ Ndaa ma lam u Yawena ni va ma teteɗna, namma ka ni na din din. Dlara Yawe daɗta ni dlara gasira, dlaamba halaŋŋi u voɗoɗu.

¹¹ Dlaamba jivi a su lorra, jivi su lor mayra ki yoori jivira lay. Dlaamba jeɓet a su mbul yumma, jivi su mbul yum ma se wilina lay.

¹² An saaŋ ma sunda hum haɗ ndaɗta wa. Aŋ warakanu kay anni sa ma hum u dlaaŋgana.

¹³ Sa ma ndak a wi coomba ki kaɗi. Vaɗ huruŋ ki egen kay coonda ŋgayra.

¹⁴ Gol saaŋ ma sunda, hin a suu ŋga tasina ganan yanɗi. Hinisi a kak mulla kanɗi, ni an hinni a sa ma pasiyakŋa kay dla cora ŋgol ka hurunɗi.

¹⁵ Hin a boy ma kal ay ki fununna, u ma ay hurunna li iriŋ jiviya, Yawe, aŋŋi ɦini manna, ma njun kanna.