SOOLLA 18 - Boy Lonana

Gi deɓ Lona kay nam suɗun kiyo

¹ Soolla vi sa ma fok suu gi soollana, soolla vi David. David, sa sunda vi Yawe, gi sool ndaɗta ni hu li ma Yawe suɗum ay ki ko suu babali mamsina, ko Sol lay.

² Nam di ana, An miniŋ cocoo, Yawe, ma ɦan saɓakŋana.

³ Yawe, aŋŋi ɦini manna, ɦoŋziin ma saɓakŋa, aŋŋi sa ma buɗun kina. Loonna, aŋŋi ɦini man ma coli fokonna ni ziin ma an ŋgay hurumma. Aŋŋi mbarina u ɓagi man ma duuna, aŋŋi sa ma suɗunna.

⁴ An cen Yawe, nam suɗun ki ko suu babali mansina wa. Gi deɓpa ni mamu.

⁵ Maɗna njunun ga u zew mamma, ndaa maɗna ka lan cocoo.

⁶ An kalni hu lina vi suu miɗina, bay ma vi maɗnana ki guni fokonu.

⁷ Hu yoo manda ni an yi Yawe, an sawalla kolo eg Lo manna. Ay hu ziimba day nam humun delenu, tii manna tew egemu cuk hurum wa.

⁸ Ndaŋgara dlaka, ŋgen taɗu, u ɦinira ŋgari gara geŋeɗ ki lay. Tlen halaŋ guruɗ ki ko yaamba.

⁹ Ndoosna cuk ay ki cinimu, kura ŋgalla kal ay ki funumu u murus kura cocoo.

¹⁰ Nam hin huulona ha tani cuk ay kaŋgaa, ɗugulla sem ay tini kaɗta doɓolok cocoo.

¹¹ Nam ful pus pus ma kulumi ma vi sa sunda huulona ma yam ana Serubimma. Nam pii kolo u garaŋ semeɗna.

¹² Nam ŋgay tam duk ndufunda, ɗugulla ki ŋguy kam a ŋgusna. Lina halaŋ mbuɗ ki ndufunda.

¹³ Dlaŋmagina u murus kura ka ɗugulla kiyo, asi cuk ay ki fokom a li kiɗikka.

¹⁴ Yawe bay ay kolo huulona, ma Kolo Dayna sawalla u delem kolo eŋga, dlaŋmagina u kura yak ki gaa.

¹⁵ Nam mun mbuurura, njay suu mam suu duuna kiyo. Nam li welera kolo cocoo, mbuɗusi ki ndaana.

¹⁶ Mbona irim ɓorow kiyo, umba gaara mbuɗ wi kiyo. U duliyara gi ayra waɗ ki halaŋ. Ni ko bay maŋga, Yawe, ni ko musuk ma yara ma sel ay ki ciniŋŋa.

¹⁷ Ay kolo huulona day, Nam maɗ kom ay kan mba tlanu, nam paɗan ay ki duk mbo ŋgolna.

¹⁸ Nam suɗun ay ki ko suu babali mansina, suu gonok man suu saɓakasi suunna.

¹⁹ Hu buu man ma yoora asi mba duurunu. Na may Yawe njun kanu.

²⁰ Nam kalan ay ki duk lassa, nam suɗun kiyo, kay nam mininu.

²¹ Yawe lan na ni u ɗegee manda, nam warakanni kay kon li va ma co kaɗi.

²² An tuɗ hu voɗta vi Yawe, humun maa voɗta vi Loonna ka kiɗi.

²³ An li u gaɗ mamba halaŋ, min mamba halaŋ an maa taa ka kiɗi.

²⁴ An li dlara co ka fokombi, an vi tanu ka a dlara co li konɗi.

²⁵ Kay ndaɗta Yawe warakanni kay ɗegee manda, nam warakanni kay kon li va ma co kaɗi.

²⁶ U suu ɗegeena ni aŋ ɗegee may, u suu li jivina ni aŋ jivi may.

²⁷ Eg suu teteɗna aŋ tak taŋ ki teteɗ may, eg suu li dla cora, aŋ takasi yaaŋga may.

²⁸ Aŋ njun u suu hoŋ yasi gana, suu ŋga tasina aŋ hoŋosi ki kaŋgaa.

²⁹ Yawe doon kura hu pindil manda ni aŋu, Loonna ka lan kiɗikka kan hu li ma ndufunna.

³⁰ U njun maŋga an su kay suu babali mansina, u Loonna an weɗ gulumunna kiyo.

³¹ Voɗta vi Lonara ki jiviya, va co ka huɗi, boy ma vi Yawena tak ki gasi ɗal ɗal. Boy mamma ni mbarina fok suu hin tasi kamma.

³² Yawe maygina dew a Lona ni namu. Ҥini ma fokoygina ni gege? Ni Lona dew.

³³ Lo namma ɦan saɓakŋa ni namu, nam minin voɗta ki jivi fokonu.

³⁴ Nam mbuɗun sen fetta ko dukka na. Nam colon ki kolo kay yam ɦinira.

³⁵ Nam takan yal ma duuna, kon ndak a ndii mbuurura kawina lay.

³⁶ Koŋ ka ŋgomon ko mbarina na, koŋ ma njufna ka van kolo a va ŋgenenɗi. Hoŋ yamba uŋ gaara mbuɗun a sa ŋgolna.

³⁷ Aŋ mbuɗun liŋ fet cocoo, ii kokot sen ka tanɗi lay.

³⁸ An dik suu babali mansina, an vasi lay, an ka hoŋ ay vo bay daɓasi ha kiɗi.

³⁹ An casi kiyo, asi ka ndak a yow kolo egenɗi, asi cuk kaŋga u sen halaŋ.

⁴⁰ Aŋ ɦan saɓak ma duuna egenu, an su kay babali mansina halaŋ.

⁴¹ Suu babali mansina mbuɗ zakaɗasi ki fokon halaŋ, an daɓ suu gonok mansina ki wa.

⁴² Asi yi koloo sa ma humusi kaɗi. Asi yi eg Yawe, nam ka humusiɗi.

⁴³ An gulukusi ki ko ndaŋgara semeɗna siiriɗ kira ɦawa na, an tayasi ki ga u sen ko luɓuna na.

⁴⁴ Aŋ suɗun ki ko yara vi suunara, aŋ kakan a mulna kay njaf suuna bolowo. Suu an ka wasiɗina lay ka ŋgaan cocoo,

⁴⁵ hu li ma asi humun dlan ha na ni ka ŋgaan cocoo. Njaf suu daŋŋa halaŋ goɓ kaŋga fokonu.

⁴⁶ Suu daŋŋa halaŋ mbuɗ ki maŋiya, asi sel ki hin ziisi ni u liŋŋa.

⁴⁷ Ŋgaagi Yawe ni Lo ma iirina. Gi deɓpa maŋ sa ma golonna. Lona ni sa ma suɗunna, ŋgaamu.

⁴⁸ Nam ɦan saɓakŋa a su kay suu duu u anna. Nam cukun suuna ga un halaŋ.

⁴⁹ Nam suɗun ki ko suu babali mansina, ni aŋ ɦan saɓak ma su kay suu duurunna halaŋ, aŋ suɗun ki ko suu lasanna lay.

⁵⁰ Kay ndaɗta an gaŋ deɓ duk njaf suuna halaŋ. An gi soolla geleɗeŋga, Yawe.

⁵¹ Aŋ mbuɗun a mulna, aŋ ka huɗun buurun foko, aŋ ka tak oo maŋga maŋ sa ma aŋ manamma, man an David u njafan halaŋ a fafaɗta.