SOOLLA 16 - Boy Lonana

Furira vi sa ma Lona suɗum ay ki fun maɗnana

¹ Soolla vi David. Ҥi, Lona, golonu, an hoŋ irinni egeŋ dew.

² An di Yawe ana, «Aŋŋi malanna, an fi jivira halaŋŋi egeŋu.»

³ Suu ɗegee suu kay mbassana, asina an ŋgaasi ni asiya.

⁴ Suu hal jivi masira eg loogi suu ɦawana, tok kasi ni wihawra ɦawana. An ka ndak a vasi busu masi ma asi yamammaɗi, vunun ka yasi sesi fununɗi lay.

⁵ Yawe ni joonna, u vaan ma cira, dlaanda fokka halaŋŋi koŋu.

⁶ Fiinna ka kolo hu li ma jivi ɦayna, nam irin jivi cocoo.

⁷ An gi deɓ Yawe sa ma ka gaɗanna, njeŋge lay hurun ka saa kam tew tew.

⁸ Yawe ka fokon tew tew, hu li ma nam ka coli kay bikin ma njufna, an ka li ndaaɗi, kay va ma ŋgenen kaɗi.

⁹ Hurun ka u furira, ŋgus manda ka u ayra, tliw tan tam koɗi u heɓpa.

¹⁰ Kay aŋ ka hinin iiri manda, ha ki hu lina vi suu miɗinaɗi, aŋ ka min ana saaŋ ma aŋ minimma loɗ kiɗi.

¹¹ Aŋ takan voɗta vi iirira, furira ŋgolla ha ni fokoŋu. Ha hu bik koŋ ma njufna, aŋ ɦan furira uɗ ka doɗira.