SOOLLA 148 - Boy Lonana

Huulona u ndaŋgara lay ŋga Lona

¹ Halleluya! Ŋgaagi Yawe ay kolo huulona day, ŋgaagina hu li ma kolo dayna,

² ŋgaagina agi suu sun mam suu huulonna, ŋgaagina agi suu duu mamsina,

³ ŋgaagina agi faɗta u tilna, ŋgaagina agi ciciwra weleɗta halaŋ,

⁴ ŋgaagina agi tlesuu ha kolo huulona dayna, u mbo ŋgol ma kolo kay huulonna lay.

⁵ Ko tlena halaŋ ŋga ni sem Yawe kay nam ɓak u vunum ɦawa na ni tle asina halaŋ li gaw.

⁶ Nam tinisi hu liisina a fafaɗta, nam tin tlesuu ka ɓeŋ kiɗina ha ki na day day.

⁷ Agi tlesuu kay ndaŋgarana halaŋ ŋgaagi Yawe, dragoŋŋa u zul ŋgolla lay,

⁸ kura, dlaŋmagina, mborhoyra, babaana, bil mbona, halaŋ ka li u boy mamma,

⁹ ɦinira fiyekka u lii mbuy kolona, ŋgusugi suu tira u gu sedrena,

¹⁰ tle bagina u yoorina, tlesuu ɦaram kaŋgana u laygina,

¹¹ muli suu kay ndaŋgarana u suuna halaŋ, goryoŋ mulinana u suu malayaŋ mbassana,

¹² gorzoŋina u gor wayagina, suu maarina u gor kemba.

¹³ Ko asi halaŋ geleɗ ni sem Yawe kay sem ŋgol su tlesuu daŋŋa halaŋ, bibiŋil mamba ti ga kay ndaŋgara lay, ha kolo huulona lay.

¹⁴ Nam ɦal saɓak ma duuna maŋ suu mamsina, suu mam suu ɗegeena halaŋ suuna ŋgaasiya, goryoŋ Israelna, ni suu ka egem tokŋa. Halleluya!