SOOLLA 147 - Boy Lonana

Ŋga Lona ma Saɓakŋa Kom Belna

¹ Halleluya! Jivi cocoo a gi soolla geleɗ Lona, ni jivi coco kay a ŋgaam u soolla.

² Yawe hoŋ min zi ma Yerusalemma, hin tok yam suu Israelna halaŋ.

³ Nammi sa ma min huu ma ki ɓeŋina, nammi sa ma njunusi mbilisina.

⁴ Nam zul ciciwra bolow cocoo, ndaɗ dew dew halaŋ nam tiniɗ seɗ ki kaɗu.

⁵ Bu Suuna maygina nam ŋgol cocoo, saɓak ɦay lay, neemba ka daɓ kiɗi.

⁶ Yawe njun u suu hoŋ yasi gana, nam hoŋ yam suu ŋga tasina ki ga ta ta duk buɗna.

⁷ Gagi soolla gi deɓpa maŋ Yawe, geleɗegi Looygina u diŋŋa.

⁸ Nam li ɗugulla kolo huulona ni namu, nam si yona ay kay ndaŋgara ni namu, nam day usuna kolo kay ɦinira ni namu,

⁹ nam ɦal tina maŋ yoorina, nam ɦal tina maŋ gor gawgawna hu li ma asi joɓomma lay.

¹⁰ Nam ka ŋga saɓak ma vi kuluminanaɗi, nam ka caa yam kay ɗoo ma vi sa warnanaɗi.

¹¹ Yawe minni suu lam ndaaramma, u suu minim ɗegee mambana.

¹² Agi suu Yerusalemma ŋgaagi Yawe. Agi suu Siyonna geleɗegi Loogina.

¹³ Kay nam dugugi vun grek magina eŋe, Varagi voni nam paɗ vunum ki kay goryogiya.

¹⁴ Nammi sa ma ɦagi heɓpa ay hu mbas magirana, nam hoɓogi ki u tlesuu jivina.

¹⁵ Nam ɦal gaɗ mamba ay kay ndaŋgara, na gawni boy mamma tew ki kay yam mbassa wa.

¹⁶ Nam si dlaŋmagina ay ga haɓpa ko ndal baraw ma cili u tlimiɗ timigiina na, nam gi mborhoyra ay ga ko ndal buɗna na.

¹⁷ Nam cuk dlaŋmagi ma ŋgolona ay ga ko ndal gogoyra na, sa ma ndak a col ko semeɗ ma nam lamma kaɗi.

¹⁸ Nam sun boy mamma aya ni nam law kiyo, nam paɗ babaana na ni mbona ɓaɗ kiyo.

¹⁹ Nam di boy mamma maŋ goryoŋ Yakobma, gaɗ mamba u min mamba nam daɗ maŋ suu Israelna.

²⁰ Gaɗ ndaɗta nam daɗ ka maŋ njaf suu daŋgi, asi ka wam gaɗ mambaɗi lay. Halleluya!