SOOLLA 145 - Boy Lonana

Ŋga Lona u ŋgol mamba

¹ Soolla geleɗta vi David. Loonna, mul manna, an geleɗeŋu, an gi deɓpa u seŋ na gak gak.

² Hu buuna halaŋ an gaŋ deɓpa, an ŋgaaŋ seŋ ha ni na gak gak.

³ Yawe nam ŋgol cocoo, ndaki kay a sa ŋgaamu, ŋgol mamba su ki kay suu warna.

⁴ Njaf suu daŋ varaka ni ka ŋgaaŋ sun maŋga tew tew, asi ka takaŋ sun maŋga aŋ laɗ u bik koŋga kiyo.

⁵ An hoŋ di dlara mbuɗ mbuɗta aŋ laɗta tew tew, ŋgol maŋga bibiŋil ta sa ndak a waɗ uɗɗira.

⁶ Asi di ki kay saɓak maŋ ma mbuɗ mbuɗta, an waŋ sun maŋga dlaɗ ŋgolla.

⁷ Hum suuna gasi kay jivi maŋga ŋgolla na gak gak, suuna hin ko kosi ni u ɗegee maŋga.

⁸ Yawe ni sa ma jivi ma wi hahaw suuna, nam ka mbuɗ ya na zakgi, ɗegeera kom ŋgol cocoo.

⁹ Yawe jivi kay suuna halaŋ, nam saa jivi kay sunda nam laɗta halaŋ.

¹⁰ Yawe, sun maŋga aŋ laɗta halaŋ ka ŋgaaŋu, suu maŋ suu ɗegeena ka gaŋ deɓpa.

¹¹ Asi ka ŋgaaŋ ŋgol maŋga bibiŋilla, asi mba njaɗ ki kay saɓak maŋŋa.

¹² Hu li ma aŋ tak saɓak maŋŋa ki maŋ suuna, tak bibiŋil mul maŋga ki lay.

¹³ Mul maŋga ni mulla din dinda, mul maŋga ka ni hu basara basara halaŋ. Lona ni gasira, ɗegee hu sun mamba halaŋ.

¹⁴ Yawe ni sa ma njun suu puk kaŋgana halaŋ, nam col suu daɓ sesina ki koloo.

¹⁵ Iira halaŋ ka cuki ni kaŋu, ka saa ni kaŋ dew, aŋ ɦasi tiisina u voɗom lay.

¹⁶ Aŋ mal koŋ kiyo, aŋ hoɓ tlesuu iiri suu aŋ minisina halaŋ.

¹⁷ Yawe ɗegee hu dlaamba halaŋ, ɗegee hu sun mamba halaŋ lay.

¹⁸ Yawe ka tok eg suu yam semma, nam ka tok eg suu yam u hurusi dewna.

¹⁹ Nam li minda vi suu lam ndaaramma, nam humusi tii masina, suɗusi kiyo.

²⁰ Yawe ka ŋgom banayamma halaŋ, may nam bulum suu bay ɗegeena kiyo.

²¹ Vunun dini dlara geleɗ Yawe, suuna halaŋ geleɗem sem ma teteɗna ha na gak gak a fafaɗta.