SOOLLA 144 - Boy Lonana

Gi deɓpa kay nam su kay suunara

¹ Soolla vi David. Gi deɓ maŋ Yawe sa ma suɗunna, nam ma ɦan saɓakŋa a li duunana, ma hinin kon eŋ a li yara u suunana.

² Nammi sa ma njununna, ni ɦoŋzi ma saɓakŋa, ni gulumun ma ka kanna, sa ma buɗun kina. Nammi mbari manna, an ŋgay tanni egemu, nam cukun suu mansina ga u saɓak manna.

³ Yawe, sa warna ni me a aŋ a wamba nige? Va ma miɗ kina a aŋ saa kammi amege?

⁴ Sa warna ni ko semeɗna ɦawa na, buu mamma kay ndaŋgara ni ko ŋgus ma maɗina ɦawa na.

⁵ Yawe ɗuɗ huulona ay kiyo mbay kay ndaŋgara. Ŋgen ɦinira na ni ndaɗ ka kura.

⁶ Gi weleɗ maŋga aya, njay suu babali maŋsina kiyo. Sun mbuuru maŋga aya viɗisi voɗosi ki irisiya.

⁷ Aŋ ay kolo day baa koŋ ay suɗun kiyo, buɗun ki ko mbo ŋgolna, suɗun ki ko suu koyogina,

⁸ vunusi dini dlara kaboyna, asi suu tasi ni kay kaboyna ɦawaa.

⁹ Lona, an min gi soolla wilira a geleɗeŋga, an caŋŋi diŋ ma zewem doogona.

¹⁰ Aŋ ɦal saɓak ma su kay suu duuna maŋ mulina ni aŋu. Aŋ suɗ saaŋ ma sunda, David, ki ko ŋgew ma vi suu ci maɗnana.

¹¹ Suɗun kiyo, buɗun kiyo, suɗun ki ko suu koyogina, suu vunusi dini dlara kaboyna. Ɗegeera cuki egesi ni ko barawna na. Asi suu tasi ni kay kaboyna ɦawaa.

¹² Goryomi ni ko ŋgusugi suu day wilina na, asi vuɗni jivi hu ziimiya, gorɓii mamisina ni ko tlesuu ndoli kolo hu zira vi mulinara na jivi cocoo.

¹³ Veeri mamisina ki oyra u njaf tlena zeɗ zeɗ, yoori mamisina zul coco lay, sa ka wasi ndumusi oloɗi.

¹⁴ Mbutlugi mamisina ɗoori cocoo. Va ma lasasi ka oloɗi. Dlara yoo ka hu ɦoŋzi maminaɗi.

¹⁵ Furira ka kay suu dla ndaɗta ka li varasina. Furira ka kay suu vi Lona, Yawena.