SOOLLA 143 - Boy Lonana

Cenda kay njunda u saɓakŋa

¹ Soolla vi David. Yawe, humun cen manda, tin humuŋu humun joɓ manda haa, u jivi maŋga u ɗegee maŋga, aŋ hoŋon dira aya.

² Kaɓakŋa kay saaŋ ma sundaɗi, kay suu iirina halaŋŋi ma iriŋ ɗegee kaɗi.

³ Suu babali mansina ka lasanu, asi van gaa tayan ki kaŋgaa, asi ganni duk ndufunda, ni ko suu miɗ ay ki day dayna na.

⁴ An hin tok a musukun kal kira, saa manda mbuɗ ki maŋiya.

⁵ Humun gan kay buu ma jak kina, an ka saa tlesuu aŋ lasina halaŋ, an hoŋ di kay sunda aŋ laɗ u bik koŋga.

⁶ An baa kon ha ni maŋu, gola, an fokoŋŋi ko ndaŋgara ki sooyra na laara laɗu.

⁷ Yawe, hoŋon dira ay zak, musukun ka oloɗi. Ŋgay taŋ ki irinɗi, li ka naɗi ni anni ko suu cuk ki ga hu zulla na.

⁸ Maɗira fo na gawni aŋ takan ɗegee maŋga kay an saa ni kaŋ dew. Takan voɗta an a tlaɗta kay an tin irin ha ni egeŋu.

⁹ Yawe, buɗun ki ko suu babali mansina, an min liin ma ŋgayra ha ni tok egeŋu.

¹⁰ Haɗan a an li u min maŋga kay aŋŋi Loonna. Musuk maŋga ndaɗ jiviya, ndaɗ tinin irin hu voɗta jivira.

¹¹ Yawe, aŋ hinin kak iiri ni kay a ŋgaaŋ seŋga, aŋ kalan ay ki duk wihawra ni u ɗegee maŋga.

¹² U ɗegee maŋga aŋ daɓ suu babali mansina kiyo, aŋ hin baan suu gonok mansina kiyo kay anni saaŋ ma sunda.