SOOLLA 141 - Boy Lonana

Cenda fiɗigira

¹ Soolla vi David. Yawe an ceneŋu, mbay zak njununu. Tin humuŋu, humun yira an ka yaŋga.

² Ko cen danda li ha fokoŋ ko mbul ma his jivina na, kon yowi kolo fokoŋ u ɓivun man ma fiɗigina.

³ Yawe, golon vunun ma di boyna, golon boy ma kal ay ki fununna.

⁴ Hinin hurun a li dla coraɗi, ka an li ko suu ka wi Lonaɗina naɗi, a taɓ u suu li dla coraɗi, ka an jukusi dlaasira coraɗi.

⁵ An minni gaɗta vi suu ɗegeena lini asi gaɗanu, ka mbul ma vi suu cona vo kanɗi ko cen manda col saɓak fokosiya.

⁶ Muli masisina zuɗusi ga kay ɦinira wa, hu li ma asi humun boy man ma jivina,

⁷ «Ko ndal sana zum ndaŋgara ki kolo a horokŋa na, sokosi ki njayra hu lina vi suu miɗina ni na may.»

⁸ Yawe, Bu Suuna, irin cuki ni kaŋu, an ŋgay tanni egeŋu, hinin a an miɗ ki ɦawaɗi.

⁹ Golon ko bay ma asi gununna fokonna, ko cenda vi suu li dla cora may.

¹⁰ Hin suu bay ɗegeena cuk ga hu zul masira ay may ni hin jak ki ni keŋeɗu.