SOOLLA 140 - Boy Lonana

Cenda kay Lona goloŋu

¹ Soolla vi sa ma fok suu gi soollana, soolla vi David.

² Ҥi, Yawe, suɗun ki ko suu cona, golon ko suu las suuna.

³ Ko suu di cora ki kan fokŋa, suu hal dlara duuna hu buuna tew tewna.

⁴ Sinisi paa ko sin guyna na, boy ma asi damma ni ko ŋgis magira na.

⁵ Yawe golon ko suu ka wi Lonaɗina, golon ko suu las suuna. Suu hal a pukun gana.

⁶ Suu ŋga tasina gun daw masina ki fokon wa, asi njun zew bayna ki keŋ voɗta, asi ka juɓunni a vanda.

⁷ An di Yawe ana, «Aŋŋi Loonna», Yawe, tin humuŋu, humun cen manda.

⁸ Lona, Bu Suuna, aŋŋi sa ma suɗunna, aŋ golon ay hu li ma duuna.

⁹ Yawe hin a suu li dla cora fi dlara asi halaɗtaɗi, hin mbeleŋ masina daɓ kiyo, kay asi hin col kolo olo.

¹⁰ Hin suu duu u anna a su kanɗi, ko dla coosira asi daɗta hoŋŋi kasiya.

¹¹ Cukusi murus kura ni kay yasiya ko ndaɗ tuɗusi ha duk kura hu zul ŋgolla, ha hu li ma asi ndak a hoŋ ay ki oloɗina.

¹² Hin suu vunusi di boy cona hu mbassa oloɗi, ni suu kosi ka viɗina, u suu hurusi cona, dikisi kiyo.

¹³ An wi ana Yawe hin li jivira kay suu wihawra, nam hin li ɗegeera maŋ suu hawra.

¹⁴ Na daŋ may, suu ɗegeena hin geleɗeŋ seŋu, suu ɗegeena hin cuk ziisi ni egeŋu.