SOOLLA 14 - Boy Lonana

Sa ma ka wi Lonaɗina

¹ Soolla vi sa ma fok suu gi soollana, soolla vi David. Sa ma giniŋŋa saa hurum ana, «Lona kaɗi.» Suu asina ɓeŋ tasi ki wa, asi li ni sunda cora. Sa ma li dlara jivi ka na dewɗi.

² Yawe ay kolo huulona ka gol suu warna aya. Ana, nam fi sa ma li dlara jivi dukusi su, fi sa ma hal Lona su?

³ Suuna halaŋ cala voɗta ki wa, sa ma li dlara jivi ka na dewɗi, na dew lay kaɗi.

⁴ Yawe joɓ tam ana, suu las ndarayasina, asina na ni, ka wi vaɗi gasi su? Suu ɗoɓ tasi ki u suu mansinana, asi tasi ki ko tlesuu tirana, asi ka goɓ Yaweɗi lay.

⁵ Suu asina halaŋ hin dlak ndaana fok Lona, hu li ma Lona hin tak tam ki duk njaf suu ɗegeena.

⁶ Agi ka caa yagi kay dlara vi suu wihawraɗi, na may Yawe ni sa ma asi ŋgay tasi egemma.

⁷ An ka juɓ suɗta, col ay hu Siyon a suɗ suu Israelna. Yawe buɗ suu mamsina ay ki hu mbaɓura, ni njaf suu vi Yakobma hin furiya.