SOOLLA 138 - Boy Lonana

Gi deɓ Lona kay oo mamba

¹ Soolla vi David. An gaŋ deɓ u hurun halaŋ, fok loogi suu ɦawana an gaŋ soolla ni maŋu.

² An goɓ ga fok Ziŋ Lonara teteɗta, an geleɗeŋŋi seŋu. Ni kay ɗegee maŋga u jivi maŋga kay aŋ vi vunuŋ ay jew day ana, sa ma hin su kay seŋŋa ni gege?

³ Buu ma an yaŋu, aŋ humunna, aŋ dliɗin saɓak manna koloo.

⁴ Yawe, ko muli suu duk ndaŋgarana halaŋ geleɗeŋu, kay asi hum ki kay vi vun ma col ay funuŋŋa.

⁵ Ko asi geleɗ sunda Yawe laɗta, «Yawe, bibiŋil maŋga ŋgol cocoo.

⁶ Gasi Yawe ni ma Kolo Dayna, nam wi suu hoŋ yasi gana aya, ay day ni nam wi suu ŋga tasina ay lay.»

⁷ Lini an ka hu yoora lay ni, aŋ mbuɗun iiriya, aŋ tin koŋ kay suu babali mansina, koŋ ma njufna ɦan saɓakŋa a su kasira.

⁸ Yawe minin dlara kan halaŋ, Yawe, ɗegee maŋga ka ni na gak gak. Aŋ ka maa sunda aŋ laɗ u bik koŋga kiɗi.