SOOLLA 137 - Boy Lonana

Yoora vi suu Israelna ay ki ŋgayra hu Babilon

¹ Ay ki tana doŋ mbo lum ma Babilonna ami laki tew tew ni u tiina ami saa ay ni kay Siyon.

² Ami gaɓ diŋ mamina ki kolo hum guguni suu fun lummana.

³ Ay hu ni suu yowomi hana joɓomi ana, gasi soolla, suu lasamina joɓ kay li furira ana, «Agi gami soolla hu Siyonda aya».

⁴ Ami hin gi soolla geleɗ Yawera ki hu mbassa daŋga ni nanage?

⁵ Lini humun maa ki kay Yerusalem wani, bikin ma njufna miɗ kiyo.

⁶ Ko sinin nereɗ ki kolo u yirɗinu, lini an ka saa kaŋ oloɗi ni. Lini an ka furi kay Yerusalem, su tlesuu daŋŋaɗi na.

⁷ Yawe, saa kay goryoŋ Edomma, suu di hu li ma Yerusalem ndi gana ana, «To zina ki ta ta tewem umba ay gii kaŋgara kiyo.»

⁸ Aŋ, Babilon, kak njokŋi aŋ hin ɓalak ki may, furira ka kay suu ɓalakaŋ ki ko aŋ ɓalakami kira na may.

⁹ Furira ka kay suu vaŋ goryoŋ casi kina luɗusi ki kay ɦinirana.