SOOLLA 132 - Boy Lonana

Ŋga ziŋ Lonara Yerusalemba

¹ Soolla suu tuɗ luu ma vi Lonna gaɗta. Yawe humuŋ gaŋ ay kay David, humuŋ gaŋ ay kay las mamba halaŋ.

² Humuŋ gaŋ kay dlara nam suu tam fok Yawe, nam vi vunum fok Ma Saɓakŋa vi Yakob lay.

³ Nam di ana, «An ka kal hu ziindaɗi, an ka buu ga kay layɗi lay,

⁴ an ka hin irin a buu senɗi, ka hiniɗ a dug kay taɗɗi lay,

⁵ bay an fi li ma vi Yawena ki baɗi. Hal zina ki kay ma Saɓakŋa vi Yakobma.»

⁶ Ay hum dla Zandukka ay hu Efrata, ay faɗ ay hu sene ma Yaarna.

⁷ «Tuɗuygi hu ziimma, goɓoygi ga fok gayamu.

⁸ Col kolo, Yawe, mbay hu liiŋ ma koɗ tara, aŋu, u Zanduk maŋga, saɓak maŋŋa ka hura.

⁹ Ko muli suu li ɓivunna cuk ɗegeera egesi ko barawna na, ko suu maŋ suu ɗegeena sawalla furiya.

¹⁰ Ni kay David saaŋ ma sunda, hin saaŋ ma aŋ Fuurumma kay tambi.»

¹¹ Yawe suu tam fun David, ni gasira nam ka hin boy namma kiɗi, «An hin kak kay dlam maŋga mulla ni sa ma col ay hu njafaŋŋa.

¹² Lini goryoŋ li u galamba an vaɗ u agira, li u gaɗta an ɦagirara may ni, goryosi lay hin lak ka hu dlam maŋga mulla a fafaɗta.»

¹³ Kay Yawe manni Siyon, nam min a li ziimma ni huwa.

¹⁴ «Siyon ɦinni a liin ma koɗ tara a fafaɗta, an hin kakŋi huwa, an minni zi namma.

¹⁵ «An hin paɗ vunun ki kay Siyon, an hin hoɓ suu hawra u funa.

¹⁶ Muli masi suu li ɓivunna an hin suɗusi kiyo, suu masi suu ɗegeena hin sawalla furira.

¹⁷ «Ni an hin kak goŋ Davidna a mul ma saɓak cocona, mul namma ni ko pindilla fok suuna na.

¹⁸ Suu babali mamsina halaŋ hin mbuɗ zolona, jum mamba mulla hin weleɗ na gak gak.»