SOOLLA 119 - Boy Lonana

Gaɗta vi Yawera

¹ Furira ka kay suu poy masira jivina, u suu tuɗ u gaɗta vi Yawera.

² Furira kay suu hoŋ tasi ga u gaɗ mambana, asi ka halam u hurusi halaŋ.

³ Asi li dlara ci maɗ kaɗi, asi tuɗ ni hu voɗta ɗegee.

⁴ Aŋ tak gaɗ maŋga ki ni aŋu, kay a suuna goloɗ u jivira.

⁵ Ko poy manda tuɗ ɗegee, kay an min li u gaɗ maŋga.

⁶ Lini an li u gaɗ maŋga wa halaŋŋi an ka ndak a puk ga oloɗi.

⁷ An geleɗeŋ u huu ma ɗegeena, an haɗ dla mayra aŋ daɗta may.

⁸ An min a li u gaɗ maŋga tew tew, aŋ noyon ki a fafaɗtaɗi.

⁹ Goozoŋŋa a hin ɗoɓ voɗ mamba ki ɗegee ɗegee ni u mege? Vi u boy maŋŋa ɗoɓoɗ ni u namu.

¹⁰ U hurun halaŋ an ka halaŋu, hinin a an tuɗ ki day eg gaɗ maŋgaɗi.

¹¹ An ŋgayaŋ gaɗ maŋga hurun kurufuwa kay an ka li dla co egeŋgi.

¹² Gaŋ deɓpa, Yawe. Haɗan gaɗ maŋga.

¹³ Vunun ka ndumuŋ gaɗ maŋga tew tew, ni boy ma col ay funuŋŋa.

¹⁴ Hu li ma an ka li u gaɗ maŋgana an ka fi ni furira na ɗow. An mbuɗ ni sa ma tlena kom cocona.

¹⁵ An ka saa kay gaɗ maŋga tew tew, an gol irinni hu voɗ maŋga.

¹⁶ An furi coco kay gaɗ maŋga, humun ka maa ki kay boy maŋŋaɗi.

¹⁷ Saa ay kay saaŋ ma sunda a nam kak iiriya, an hin vaŋ boy maŋŋa kan tew tew.

¹⁸ Malan irin kiyo, an mbuɗ wiya, a wi dlaaŋga mbuɗ mbuɗta.

¹⁹ Kay ndaŋgara anni koyna, ŋgayan gaɗ maŋga ki kanɗi.

²⁰ Hurun ka haɗ cocoo, an min waŋ gaɗ maŋga hu lina halaŋ.

²¹ Aŋ gaɗ suu ŋga tasina, suu viɗ ha ki day eg gaɗ maŋgana.

²² Buɗun ki ko ŋgulla u pan ma vi suunana, kay an ka lini u gaɗ maŋga.

²³ Lini mulina tok tasi a gi wayra kan lay ni, saaŋ ma sunda saa ni kay gaɗ maŋga hol.

²⁴ Gaɗ maŋga ni vara ka furiyunda, ndaɗ ka neenni ndaɗu.

²⁵ Gola, an cemi ka gi ga duk buɗna, u boy maŋŋa aŋ mbuɗun iiriya.

²⁶ An takaŋ sun manda ki halaŋ, aŋ hoŋon dira wa may, haɗan gaɗ maŋga aya.

²⁷ Hinin an tuɗ hu voɗ gaɗ maŋga ɗegee, an hin saa kay dlaaŋga mbuɗ mbuɗta tew tew may.

²⁸ Wihawra ka daɓan simina ki irinu, colon ki kolo u boy maŋŋa.

²⁹ Hinin a an tli voɗta vi suu ka boyna konɗi, u jivi maŋga hinin an lini u gaɗ maŋga.

³⁰ An manni voɗ maŋga ɗegeera, an buu tanni kay boy maŋŋa.

³¹ An ka di ki ni kaŋu, Yawe, hinin a an puk ki gaaɗi.

³² An liŋŋi hu voɗta gaɗ maŋga ka hura, kay aŋ malan saa manda ki wa.

³³ Yawe takan voɗ gaɗ maŋga, warak manna aŋ wammi aŋu.

³⁴ Mbuɗun a sa ma neeyna, an hin li u gaɗ maŋga. An hin vaɗ ni u hurun halaŋ.

³⁵ Tuɗun irin hu voɗ gaɗ maŋga, kay ndaɗ irin jiviya.

³⁶ Mbuɗun hurun kay gaɗ maŋga na ɗow, ka kay begera vi suu kay ndaŋgaranaɗi.

³⁷ Hinin irin a gol tlesuu kaboynaɗi, hinin an poy ni hu voɗ maŋga.

³⁸ Hin a saaŋ ma sunda ndumuŋ gaɗ maŋga tew tew a laŋ ndaaraŋu.

³⁹ Maaran humun ki kay ŋgulla kay boy maŋŋa nam jiviya.

⁴⁰ Na daŋ may, an minni gaɗ maŋga, hinin kak iiri u ɗegee maŋga.

⁴¹ Ko jivi maŋga mbay kanu, Yawe, u suɗta ko col ay koŋga na.

⁴² Ni an hin fi boy ma dam maŋ suu ŋgulunna kay an saa ni kay boy maŋŋa dew.

⁴³ Paɗan boy maŋ ma gasina ki fununɗi kay an saa ni kay dlara aŋ daɗta.

⁴⁴ An ŋgomoŋ gaɗ maŋga na gak gak ha fok na din din lay.

⁴⁵ Ni an poy yan ki buɗiya kay an halaŋŋi gaɗ maŋga.

⁴⁶ An ɓakaŋ dla gaɗ maŋga ki fok mulina, an ka li zolo kay gaɗ maŋgaɗi.

⁴⁷ An furi coco a li u gaɗ maŋgara kay an miniɗ cocoo.

⁴⁸ An tli kon kolo fok gaɗ maŋga an miniɗ ɦayra, an saa kay gaɗ maŋga tew tew.

⁴⁹ Humuŋ gaŋ kay boy ma aŋ dam maŋ saaŋ ma sundana, ni boy ma an ka saa kam tew tewna.

⁵⁰ Nam ka ɗilin irin hu hahaw manda kay gaɗ maŋga mbuɗun iiriya.

⁵¹ Suu ŋga tasina panan cocoo, na lay ni an hiniŋ gaɗ maŋga ka kiɗi.

⁵² Yawe humun ka gan kay boy ma aŋ damma tew tew, nam ka ɗilin irinni namu.

⁵³ Hu li ma an wi suu bay ɗegeena hiniŋ gaɗ maŋga ki na ni, hurun haɗ cocoo.

⁵⁴ Gaɗ maŋga mbuɗ ni a soolla an gaɗta, hu zi ma an tuɗ huna halaŋ.

⁵⁵ Njeŋge ni humun ka gan kay seŋu, Yawe, ni kay a li u gaɗ maŋgara.

⁵⁶ Vaan ma kon ŋgolna ni kay a li u gaɗ maŋgara hol.

⁵⁷ Yawe, dlaanda an daɗ kiwa ni kay a li u boy maŋara.

⁵⁸ U hurun halaŋ an hal ni jivi maŋga, wan hahawan ay ni u jivi maŋga.

⁵⁹ An saa kay poy manda, an hoŋ sen ay ni hu dla gaɗ maŋga.

⁶⁰ An ka vi yanɗi, ɓaɗ tan zak zak, ni kay a li u gaɗ maŋgara.

⁶¹ Zew ma vi suu bay ɗegeena van wa, humun ka maa ki kay gaɗ maŋgaɗi.

⁶² Duk ŋgikka lay an col kolo geleɗeŋu ni kay boy maŋ ma gasina.

⁶³ An taɓ tan u suu laŋ ndaaraŋŋa, u suu li u gaɗ maŋgana halaŋ.

⁶⁴ Ndaŋgara ka jivira ni u ɗegee maŋga, Yawe, haɗan gaɗ maŋga aya.

⁶⁵ Aŋ li jivira kay saaŋ ma sunda, ni u boy maŋŋa, Yawe.

⁶⁶ Haɗan kay kaɓak maŋŋa u wiiŋga kay an gol tan jivi ko gaɗ maŋga.

⁶⁷ Jew a an hoŋ yan ga u gaɗ maŋgara ni an ay ki viɗiya, cemi wanda an lini u gaɗ maŋga.

⁶⁸ Aŋŋi sa ma jivina, ɗegee lay, haɗan gaɗ maŋga aya.

⁶⁹ Suu ŋga tasina mbuɗun ki nje nje u kaboy masina, an may ni min li u gaɗ maŋga u hurun halaŋ.

⁷⁰ Hurusi ki ɓaliya ka hum dlaɗi, an may ni furi ni kay gaɗ maŋga.

⁷¹ An hoŋ yan ga na ni kan jivi cocoo, ni kay a haɗaŋ gaɗ maŋgara.

⁷² Gaɗta kal ay ki funuŋga kan jivi cocoo su tlesuu lorra u gursura bolow lay.

⁷³ Aŋ lanni aŋu, aŋ ka golonu, mbuɗun yali, an a haɗaŋ gaɗ maŋga may.

⁷⁴ Suu laŋ ndaaraŋŋa wan na ni furiya, kay an tin saa manda ni kay boy maŋŋa.

⁷⁵ Yawe, an wi ana boy ma aŋ damma ni ɗegee, aŋ hoŋon yan ga ni u voɗoɗu.

⁷⁶ Ko ɗegee maŋga ɗilin irinu, ko an laɗ kay saaŋ ma sunda na.

⁷⁷ Ko lalam maŋga kal hurunu an kak iiriya, kay gaɗ maŋga kan jivi cocoo.

⁷⁸ Tok zolona kay suu ŋga tasina suu ndakan ki u kaboy masinana, an may ni saa ni kay gaɗ maŋga hol.

⁷⁹ Ko suu laŋ ndaaraŋŋa hoŋ ay egenu, a asi waŋ dla gaɗ maŋga ki may.

⁸⁰ Ko an lini u gaɗ maŋga na ɗegee kay a dlara zolo li kanɗi.

⁸¹ An loɓ ki coco ko juɓpa an ka juɓuŋ suɗ maŋgara. An saa ni kay boy maŋŋa.

⁸² Irin loɓ ki ko halla halaŋ gaɗ maŋgara, an ɓak tan ana, «Aŋ hin ɗilin irinni saɓage?»

⁸³ An mbuɗ ni ko ndal mbu mbu yo ma ay cuki kolo duk ndoosnana na, na lay ni humun ka maaraŋ gaɗ maŋga kiɗi.

⁸⁴ Buu ma vi saaŋ ma sundana hin kay ndaŋgara ni gage? Aŋ hin kaɓakŋa kay suu lasanna ni saɓa tuge?

⁸⁵ Suu ŋga tasina veken zulla ki fokonu, ni suu ka miniŋ gaɗ maŋgaɗina.

⁸⁶ Gaɗ maŋga halaŋŋi ɗegeera, asi ka lasan u kaboyna, njun ay unu.

⁸⁷ An ki loɓi cocoo ni ko ki vi gara na lay, ni an hiniŋ gaɗ maŋga ka kiɗi.

⁸⁸ Mbuɗun iiri u ɗegee maŋga, an hin lini u va ma vunuŋ dannana.

⁸⁹ Yawe, boy maŋŋa ka kolo huulona a fafaɗta.

⁹⁰ Ɗegee maŋga ka ni na din din, aŋ min ndaŋgara, ndaɗ ka coli eŋ tew tew.

⁹¹ Tlena ka jivi cecemi halaŋŋi u boy maŋŋa, kay hu duliyara halaŋŋi tlesuu sun maŋsina.

⁹² Lini gaɗ maŋga lan dlara jivira naɗi, ni an ki ginni baaya.

⁹³ Lini nanagelay humun ka maa ki kay gaɗ maŋgaɗi, kay an ka iirira ni uɗu.

⁹⁴ Anni maŋu, suɗun kiyo, kay an hal ni gaɗ maŋga.

⁹⁵ Suu bay ɗegeena halan a baan kiyo, an may ni kak irin ɗili u gaɗ maŋga.

⁹⁶ Tlesuu hu duliyara jivina halaŋ daɓ masira kaa, na may gaɗ maŋga ka ni na din din.

⁹⁷ An miniŋ gaɗ maŋga cocoo, an ka saa kaɗ hu buuna halaŋ.

⁹⁸ Gaɗ maŋga mbuɗun yal su suu babali mansina, an min a li uɗ jivi ha fok na ɗow ɗow.

⁹⁹ An mbuɗ yal su suu haɗanna, kay an ka saa kay gaɗ maŋga.

¹⁰⁰ An mbuɗ gi ii dlara ki su suu ŋgolona, kay an ka saa kay gaɗ maŋga.

¹⁰¹ An noy voɗta cora ki halaŋ, ni kay a li u boy maŋŋara.

¹⁰² An hiniŋ boy maŋ ma aŋ damma ka kiɗi, kay aŋ taŋga haɗanni aŋu.

¹⁰³ Ko gaɗ maŋga li funun jiviya, jivi funun su mbul yumma.

¹⁰⁴ An mbuɗ ɓorow ii dlara ki ni u gaɗ maŋga, an hin voɗta vi suu kaboyna ki halaŋ.

¹⁰⁵ Boy maŋŋa ni pindilla fok senda, ni kiɗikka hu voɗ mandara lay.

¹⁰⁶ An suu tanu, an li u suu manda may, an min a li u boy maŋ ma ɗegeena.

¹⁰⁷ An cemi yan ki hoŋi ga cocoo, Yawe, hinin kak iiri u boy maŋŋa.

¹⁰⁸ Yawe van ɦal manda u cen manda gi deɓpa, haɗan gaɗ maŋga.

¹⁰⁹ An ki tok fun li ma miɗna lay ni, humun ka maaraŋ gaɗ maŋga kiɗi.

¹¹⁰ Suu bay ɗegeena gunun dawna ki fokonu, na may an tuɗ ka ki day eg gaɗ maŋgaɗi.

¹¹¹ Gaɗ maŋga halaŋ mbuɗ ki ni a vaan ma kay tanna, ndaɗ hin ki ni a furi manda hurunda.

¹¹² An haɗ tan a li u gaɗ maŋga. Ndaɗ hin ki ni a warak manna.

¹¹³ An ka min suu hurusi mbambanaɗi, may an miniŋŋi gaɗ maŋga u hurun halaŋ.

¹¹⁴ Aŋŋi ŋgus ma kanna u mbari manna, an tin saa manda ni kay boy maŋŋa.

¹¹⁵ Agi suu cona ɦuɗugi ha ki egen na day, an hin li ni u gaɗta vi Loonnara.

¹¹⁶ U min maŋga aŋ li a sa ma njununna, ni an hin kak iiriya, hinin a juɓ manda li ki ɦawaɗi.

¹¹⁷ Van kon koloo, ni an hin suɗ kiyo, an ka hin a viɗiŋ dla gaɗ maŋga kiɗi.

¹¹⁸ Aŋ dik suu ka min a li u gaɗ maŋgaɗina ha ki egeŋ day, kay sun masira ni kaboyna sak sak.

¹¹⁹ Aŋ gol suu li dla cora ha kiyo ko tlesuu cukusi ha ki hu zullana na, an may ni miniŋŋi gaɗ maŋga.

¹²⁰ Tan halaŋ ka dlak coco kay ndaa ma an ka lam koŋŋa, an liŋ ndaa boy ma aŋ damma cocoo.

¹²¹ An lini u gasira u ɗegeera may, hinin ki maŋ suu duu u annaɗi.

¹²² Maa ki kay jivira laɗ maŋ saaŋ ma sundaɗi, hin a suu ŋga tasina lasanɗi.

¹²³ Irinda juɓuŋ suɗ maŋgara loɓ ki coco, u halla halaŋ gaɗ maŋga ɗegeera.

¹²⁴ Li u saaŋ ma sunda ko aŋ minda na, haɗan gaɗ maŋga.

¹²⁵ Anni saaŋ ma sunda, ɦan yal ma ɓorow ii dlara kina, ni an hin waŋ dla gaɗ maŋga ki may.

¹²⁶ Ҥi, Yawe, lin ndak wa a aŋ kaɓak maŋara, asi ɓalakaŋ gaɗ maŋga cocoo.

¹²⁷ An may ni minni gaɗ maŋga, miniɗ su lor mayra yoori jivi cocora.

¹²⁸ Hu gaɗ maŋga dew dew halaŋ an faɗ ni ndaɗ jiviya, an hin voɗta vi suu kaboyna ki halaŋ.

¹²⁹ Dla gaɗ maŋga dlaɗ mbuɗ mbuɗ cocoo, an may ni min li ni uɗu.

¹³⁰ Humba hum u boy maŋŋa lira tak kiɗikka cocoo, ndaɗ ɓorow ii dlara ki ko suu hoŋ yasi gaana.

¹³¹ Vunun ki ŋgooyra na hoŋ a likiŋ boy maŋŋa u gaɗ maŋgara.

¹³² Mbuɗ iriŋ ay egenu, lan oora kanu, ko aŋ saa a laɗ kay suu miniŋ seŋara na.

¹³³ Ҥan saɓakŋa hu tuɗ manda, hinin a dla cora su kanɗi.

¹³⁴ Buɗun ki ko suu lasanna, an hin li u gaɗ maŋga.

¹³⁵ Kay saaŋ ma sunda ni aŋ lam kiɗik maŋga kamu, haɗan gaɗ maŋga may.

¹³⁶ Irin ka ɓaɗ simina ko mbona na kay suuna ka li u gaɗ maŋgaɗi.

¹³⁷ Yawe aŋŋi sa ma ɗegeena, boy ma aŋ damma nam ɗegee lay.

¹³⁸ Aŋ ɓii diki maŋga halaŋ ndaɗ ɗegee, ndaɗ ka ni ɗegee tew tew.

¹³⁹ Hurun ma haɗta ŋgalan ki hurun ko kura na, kay suu babali mansina maa boy ma aŋ damma ki wa.

¹⁴⁰ Boy ma aŋ damma halaŋŋi gasira, saaŋ ma sunda minimmi namu.

¹⁴¹ An ki iɗi cocoo, sa ka golon oloɗi lay, an maaraŋ gaɗ maŋga ka kiɗi.

¹⁴² Ɓak maŋŋa ni na ɗegee a fafaɗta, gaɗ maŋga ni gasira.

¹⁴³ Hahawra u yoora fan wa, na may gaɗ maŋga ni furi manda.

¹⁴⁴ Diki maŋga ha ni na din din, ɦan yal ma ɓorow ii dlara kina, ni an hin kak iiriya.

¹⁴⁵ Yawe, an yi ni u hurun halaŋ, aŋ hoŋon dira aya, an lini u gaɗ maŋga.

¹⁴⁶ An yaŋu, suɗun kiyo, ni an hin hum u di ki maŋga.

¹⁴⁷ An col ki kolo jew lina bay foo, an ka sawalla, an tin saaranni kay boy maŋŋa.

¹⁴⁸ An mal irin ki ni lerra bay ndakka, ni a saa kay boy maŋŋara.

¹⁴⁹ U ɗegee maŋga humun delen haa, Yawe, hinin an kak iiri ni u min maŋga.

¹⁵⁰ Suu co suu lasanna ka ɦuɗ tasi ay egenu, asi ni suu dukusi ki day u gaɗ maŋgana.

¹⁵¹ Yawe, aŋ may ni ka ni tok daŋ, gaɗ maŋga halaŋŋi gasira.

¹⁵² An waŋ diki maŋga ay kini day day. Aŋ tin gaɗ maŋga ni a fafaɗta.

¹⁵³ Wan hahaw manda, buɗun kiyo, kay an maa ka ki kay gaɗ maŋgaɗi.

¹⁵⁴ Doo kanu, njun unu, hinin kak iiri u min maŋga.

¹⁵⁵ Suɗta ha ki na day eg suu bay ɗegeena, kay asi halaŋ dla gaɗ maŋga kaɗi.

¹⁵⁶ Yawe oo maŋga ka ndumbi, hinin kak iiri u boy ma aŋ damma.

¹⁵⁷ Suu lasanna u suu babali mansina ka bolow cocoo, na may an tuɗ ka ki day eg di ki maŋgaɗi.

¹⁵⁸ An wi suu ka miniŋ boy maŋŋaɗina na ni ka irin jiviɗi, kay asi ka hum u min maŋgaɗi.

¹⁵⁹ Aŋ gola an miniŋ gaɗ maŋga cocoo, Yawe, hinin kak iiri u min maŋga.

¹⁶⁰ Va ma jewna hu boy maŋŋa ni gasira, dla mayra ɗegee ta aŋ daɗta halaŋ ka ni na din din.

¹⁶¹ Mulina lasan kini bay u boyna, hurun li ndaana ni kay boy maŋŋa dew.

¹⁶² An furi ni kay min maŋga, ni ko sa ma ɦurum tlena ay fun duuna na.

¹⁶³ An ka min kaboynaɗi, nam ka jiviɗi, an miniŋŋi gaɗ maŋga.

¹⁶⁴ Hu buuna dew ni an geleɗeŋ sen kiɗisiya kay dlaaŋga ɗegeera.

¹⁶⁵ Heɓpa ŋgolla ka kay suu miniŋ gaɗ maŋgana, suu asina va ma daɓasi sesi kaɗi.

¹⁶⁶ Yawe, an ka juɓ suɗta ni koŋu, an li ki u gaɗ maŋga halaŋ lay.

¹⁶⁷ An hum u gaɗ maŋga, an miniɗ gasi cocoo.

¹⁶⁸ An hum u boy maŋŋa, hum u gaɗ maŋga may, voɗ manda halaŋ ka ki fokoŋu.

¹⁶⁹ Yawe, ko wal manda tew ha ki egeŋu, ɦan yal ma ɓorow ii dlara kina ni u boy maŋŋa.

¹⁷⁰ Ko tii manna tew ha ki egeŋu, buɗun ki u min maŋga.

¹⁷¹ Ko vunun ŋgaaŋŋi aŋ na dew, kay aŋ haɗan gaɗta aŋ daɗta ki wa.

¹⁷² Ko sinin gini soolla geleɗeŋga, kay gaɗ maŋga halaŋŋi ɗegeera.

¹⁷³ Ko aŋ mbay njun unu, an manaŋŋi gaɗ maŋga.

¹⁷⁴ Yawe, an hal suɗta ay ni koŋu, gaɗ maŋga irin jiviya.

¹⁷⁵ Ko an kak iiri ni kay a geleɗeŋga, boy ma aŋ dam ma gasina mbay njun unu.

¹⁷⁶ An poy ni ko goo timii ma viɗ ki ŋgoo bagina na, hal saaŋ ma sunda kay an maa ka ki kay gaɗ maŋgaɗi.