SOOLLA 118 - Boy Lonana

Gi deɓpa maŋ Lona kay suɗ mamba

¹ Geleɗegi Yawe kay nam jiviya, ɗegee mamba ka ni na din din.

² Suu Israelna di boy namma tew tew, «Ɗegee mamba ka ni na din din.»

³ Agi suu vi Aaronna di boy namma tew tew, «Ɗegee mamba ka ni na din din.»

⁴ Suu li ndaa Yawena di boy namma tew tew, «Ɗegee mamba ka ni na din din.»

⁵ Hu li ma suuna ŋguyun yanna ni an yi Yawe, Yawe hoŋon dira, tinin ki hu li ma jivina.

⁶ Yawe ni manna, an ka li ndaa va oloɗi, suuna ndak a lan me egenni ge?

⁷ Yawe ni manna, nam mba njun unu, an pan suu babali mansina.

⁸ Jivira ni ŋgay taŋ tok eg Yawe, su mayra tin saa maŋga kay suu warnara.

⁹ Jivira ni ŋgay taŋ tok eg Yawe, su mayra tin saa maŋga kay mulinara.

¹⁰ Njaf suuna halaŋ ŋguyun yan a duurunda, u sem Yawe an su kasi u saɓak mamma.

¹¹ Asi ŋguyun yanu, ŋguyun yanu, u sem Yawe an su kasi u saɓak mamma.

¹² Asi ŋguf ki kan ko ndal dlunukŋa na, ko ndal wayara siiɗ cimira na, u sem Yawe an su kasi u saɓak mamma.

¹³ Aŋ zuɗun a an puk gara, may Yawe van kon kolo.

¹⁴ Saɓakan ma sawalla a duuna col ay ni komu, kay ndaɗta an ka ŋgaamu.

¹⁵ Hu zi ma vi suu ɗegeena ay ka hum geleɗta furira, «Ɗegeera vi Yawera ndak ki hu lina halaŋ.

¹⁶ Ɗegeera vi Yawera wul ki kolo day. Ɗegeera vi Yawera ndak ki hu lina halaŋ.»

¹⁷ Ҥawaa, an ka miɗɗi, an hin kak iiriya, kay a njaɗ ki kay sunda Yawe laɗta.

¹⁸ Gasi daŋ may Yawe gaɗanu, na may nam can ka ki cii gawɗi.

¹⁹ Malan ki vun goŋga vi ɗegeera kiyo, an hin kal hu a geleɗ Yawe.

²⁰ Ni vun zina vi Yawe, ko suu ɗegeena cuk huwa.

²¹ An geleɗeŋu, kay aŋ hoŋon dira wa, kay ndaɗta an ka ŋgaaŋu.

²² Ҥinira suu min goŋga noyoɗ ki kaŋgara, hin mbuɗ a jiv goŋga ki ni ndaɗu.

²³ Gola ni dlara Yawe laɗta, aygi goloɗ na ni, ndaɗ su ki kaygi cocoo.

²⁴ Gola, ni buu ma Yawe ŋgaamma ko nam li kaygi jivi u furira.

²⁵ Ҥi, Yawe, njun ay umiya. Ҥi, Yawe, ɦami saɓakŋa a su kay suu babali mamsina.

²⁶ Jivira ka kay sa ma kal kalafi u sem Yawena, ami suu ka ki jew hu Ziŋ Yawena paɗ vunumi ki kagiya.

²⁷ Yawe ni Lona, nam ɦaygi kiɗikka, hu buu ma li luuna doogi kura kogiya, tuɗ ta ta tew hu givin ma togolla eg mekŋa.

²⁸ Aŋŋi Loonna, an geleɗeŋu, Loonna, an ka ŋgaaŋu.

²⁹ Ŋgaagi Yawe kay nam jiviya, ɗegee mamba ka ni na din din.