SOOLLA 116 - Boy Lonana

Cenda vi sa ma suɗ ay ki fun maɗnana

¹ An minni Yawe kay nam humun delenda cenda hawa,

² nam mbuɗ humum ay egenu, hu iiri manda halaŋ an yammi namu.

³ Miɗna njunun ga u zew mamma, anni njuni ga hu lina vi suu miɗina, an ka ni hu yoora u wihawra.

⁴ An yi Yawe kolo u semu, «U oo maŋga, Yawe, buɗun kiyo.»

⁵ Yawe, nam jiviya, ɗegee lay, Looygina ni sa ma wi hahaw suuna.

⁶ Yawe ka gol suu ka ŋga tasiɗina, an ay maŋiya, nam suɗun kiyo.

⁷ Iiri manda koɗ tak ɗaŋ kay Yawe lak jivira wa.

⁸ Aŋ buɗun ay ki hu miɗna, aŋ ɗokon irin ko simi ma tiina wa, aŋ golon sen ma ndi hu zulla lay.

⁹ Ni kay a an tuɗ fok Yawe hu mbassa vi suu iirina.

¹⁰ Hu li ma an di ana, «An ki hahaw coco lay ni,» an tin saa manda ni kamu.

¹¹ An ɓak tan hu las manda ana, «Suuna halaŋŋi suu kaboyna.»

¹² An hin gi deɓ Yawe ni ana mege? Kay jivira nam laɗ kanda.

¹³ An tin luu ma furi kay suɗtana, an yi kolo ni sem Yawe.

¹⁴ An li dlara an vi vunun ki kaɗta fok Yawe, fok suu mamsina halaŋ lay.

¹⁵ Yawe wi suu ɗegeena miɗ ki na ni hurum tam cocoo.

¹⁶ Wan hahawanu, Yawe, kay anni saaŋ ma sunda, ni goŋ cara sunuŋga lay. Aŋ buɗun zew ma njunun gana ki wa.

¹⁷ An dan ɓivun ma ŋgaaŋŋa, an yi Yawe u semu.

¹⁸ An li dlara an vi vunun ki kaɗta fok Yawe, fok suu mamsina halaŋ lay,

¹⁹ hu vo kurufu hu kaama kay ziŋ Yawerana, vo hu Yerusalem kurufuwa. Halleluya.