SOOLLA 115 - Boy Lonana

Ҥal ŋgolla ni maŋ Lona dew

¹ Yawe ami kay tamira ndak kaɗi, ami ŋgaaŋŋi seŋ aŋ dew, ni kay jivi maŋga u ɗegee maŋga na hol.

² Suu ka wi Lonaɗina di kami ana, «Loosina ni arage?» kaymege?

³ Loomina ka kolo huulona, dlara nam miniɗta nam laɗ halaŋ.

⁴ Fuli masisina ni tusuna u lorra, ni tlesuu sana lasi u bik komma.

⁵ Asi vunusi ka, may ka njaɗɗi, irisi ka lay, ni ka wiɗi,

⁶ humusi kaa, may ka humbi, cinisi ka may ni ka hisɗi,

⁷ kosi ka may ka kaw vaɗi lay, sesi ka lay ni ka tuɗɗi lay, delesi ka ɓakgi lay.

⁸ Suu masi suu minisina tli tasi ni ko ndal asi na may, suu tin saa masira kasina halaŋ ni ko ndal asi na.

⁹ Agi goryoŋ Israelna, tin saa magira ni kay Yawe, nammi sa ma njun usina, ni mbari masina.

¹⁰ Agi suu vi Aaronna tin saa magira kay Yawe, nammi sa ma njun usina, ni mbari masina.

¹¹ Agi suu li ndaa Yawena tin saa magira ni kamu, nammi sa ma njun usina, ni mbari masina.

¹² Yawe humum gam ay kaygiya, nam paɗ vunum ki kay suu Israelna, nam paɗ vunum ki kay suu vi Aaronna,

¹³ Yawe paɗ vunum ki kay suu lam ndaaramma, kem gorira u suu ŋgolona lay.

¹⁴ Ko Yawe zulugiya, agi u goryogi halaŋ.

¹⁵ Yawe paɗ vunum ki kagiya, nammi sa ma li huulona u ndaŋgarana.

¹⁶ Huulona ni vi Yawe, na may nam ɦal ndaŋgara ki maŋ suu warna.

¹⁷ Suu miɗina ka ŋga Yawe ni asiɗi, asi ha ki hu lina vi suu miɗina ni ka ndak a ŋgaambi.

¹⁸ Aygi may ni gaygi deɓpa maŋ Yawe ha na gak gak. Halleluya.