SOOLLA 112 - Boy Lonana

Paɗvunna ka kay sa ma li ndaana u Yawena

¹ Halleluya. Furira ka kay sa ma li ndaa Yawena u sa ma minim gaɗ mambana may.

² Njafam ki saɓakŋa coco kay ndaŋgara, njaf suu li dlara ɗegeera paɗvunna vi Lona ka kasiya.

³ Sa namma tlena varam cocoo, ɗegee mamba tuɗ fok na gak gak.

⁴ Duk ndufunda lay ni vun sa ma ɗegeena ka tak kiɗikka maŋ suu ɗegeena. Nammi ɗegee, wi hahaw suuna lay.

⁵ Sa ma li jivina ni sa ma kabalna kay suuna, nam bas tlegeyemmi u ɗegeera.

⁶ Tew tew ni nam ka kaki eŋe, sa ma ɗegeena hum suuna ka kam tew tew.

⁷ Lini nam hum dla lay, hurum ka mbuɗ zakgi, kay viimba saɓaki, nam tin saa mamba ni kay Yawe dew.

⁸ Huu ma sooy eŋŋa ka li ndaa vaɗi, nam wi ki ana nam hin su kay suu babali mamsina.

⁹ Nam ɦal tlena ki maŋ suu hawra cocoo, Ɗegee mamba ka ni na din din, nam hin fi saɓakŋa u bibiŋilla.

¹⁰ Suu li dla cora wam na ni hurusi haɗ cocoo, Asi muɗ siisi na ŋgirit ŋgirit hurusi ɓeŋ cocoo, dlara suu cona saaraɗta daɓ ki ni ɦawaa.