SOOLLA 109 - Boy Lonana

Tiina vi sa ma ka lasna

¹ Soolla vi sa ma fok suu gi soollana, soolla vi David. Ҥi, Lona, an ka ŋgaaŋu, seŋ taŋ kiɗi,

² kay suu li dla cora u suu kaboyna ŋguyunu, asi njaɗanni u della kaboyna.

³ Asi ŋguyun yan u boy masi ma gonokka, asi duu u anni bay u boyna.

⁴ Kay min manda asi ka duurunu, an may ni, an ka ceneŋu.

⁵ Asi hoŋoŋ jivira ni u cora, min manda asi hoŋoɗ ni u honira.

⁶ Asi di ana, man sa ma dew a kaam ɓakŋa kamba, ni sa ma co ma kal kamma.

⁷ Hu li ma kaɓakŋa ni kaam ɓak ma cona kamu, cen mamba mbuɗ ki ni sulukŋa.

⁸ Ko buu mam ma hu duliyara hoŋ ay ki dagani, sa ma daŋ varak ki hu balamamu.

⁹ Ko goryom hin ki kuyu wa, ko caamba hin ki donoo.

¹⁰ Ko goryom hin ki a suu zolomba, a suu saa tlena vi suuna ɦawaa, asi tuɗ saa tina ha ki day eg ziisi ma ki bowi gana.

¹¹ Ko suu cona ɦurumusi tlegeyesi kiyo, ko suu daŋŋa ɓaɗasi warak masina kiyo.

¹² Ko sa li u nam ɗegee dewɗi, ko sa wam hahaw goryom suu kuyunaɗi.

¹³ Ko njafam bulum kiyo, sesi bulum ki duk njaf suu hin ka daganna.

¹⁴ Yawe humum gam kay cora somoyosi laɗta, a cora vi sumba ko bulum kiɗi.

¹⁵ Ko dla ndaɗta hin ha fok Yawe na gak gak, nam bulumusi dlasi ki hu duliyara.

¹⁶ Sa namma ka min a li dlara jivi na dewɗi, nam las suu hawra ko casi ki cira na, ci sa ma hahawra lay,

¹⁷ nam minni givunna, nam hin hoŋŋi kam tamba tok, nam ka min paɗvunnaɗi, paɗvunna ɦuɗ ha ki egem day may,

¹⁸ nam cuk givunna egem ko ndal barawna na, givunna kal ki duk tliwim ko ndal yona na, hoo ki egem ko ndal mbulna na.

¹⁹ Ko ndaɗ hin egemmi a baraw mam ma cukka, ni a tlakara njuni hurumba.

²⁰ Yawe warak suu gonokka u anna ni ko ndaɗta na. Ni suu ɓak dla cora u senna.

²¹ Aŋ Yawe, Bu Suuna, wan hahawanu, ni a suuna ŋgaaŋ seŋu. Ɗegee maŋga u dlara aŋ laɗ jivira, buɗun kiyo.

²² Anni sa ma haw cocoo, ki hahaw coco lay, hurun kurufu ni ki kaay mbilna.

²³ An tuɗ ki ni ko ŋgus ma fiɗigina ɦawa na, asi dikinni ko ndal jeena na.

²⁴ An li laara tliwin mbuɗ ki maŋi cocoo, goloŋot sen mbuɗ muɗunu, mbul ka duk sokon oloɗi.

²⁵ An mbuɗ ii suuna ni a va ma sanda, suuna wan na ni kisik yasi unu.

²⁶ Njununu, Yawe, Loonna. Suɗun ki ni u ɗegee maŋga.

²⁷ A asi waŋ koŋ ma saɓakŋa, waŋ sun maŋga may, Yawe.

²⁸ Asi ka ŋguluŋu, aŋ paɗ vunuŋ ki kasi may. Gola, asi yow kolo, mbuɗ kasi ni zolona, saaŋ ma sunda furiya.

²⁹ Ko suu yakanna zolo masina hoŋ ha kasiya, zolona kuluɓusi ko barawna na.

³⁰ An geleɗ Yawe kolo u delenda eŋga, an ŋgaam duk suu moli cocona.

³¹ Kay nam ka njun u suu hawra, kay suɗusi ki ko suu kaɓakŋa.