SOOLLA 107 - Boy Lonana

MAGAARA VADLLA SOOLLA 107—150 Gi deɓ Lona ma buɗ suuna kina

¹ Ŋgaagi Yawe kay nam jivi ɦay, ɗegee mamba ha ni na din din.

² Ko suu Yawe suɗusi ay kina dam dlam ha kiyo, suu nam suɗusi ay ki ko suu babali masisinana,

³ suu nam tokosi ay ki hu mbassa zeɗ zeɗna, ay u maɗina u fiɗigina, ay mbayaw u dali layna, nam hoŋosi ay ki hu mbas masira.

⁴ Suu daŋŋa viɗ ha ki ŋgoo bagiya, asi fi zi ma asi a lak huna kaɗi.

⁵ Mayra casiya, laara lasi lay, asi laɓ ha ki ŋgooro.

⁶ Asi yi kolo eg Yawe hu las masira, nam buɗusi ay ki hu wihaw masira.

⁷ Nam takasi voɗta tuɗ ɗegeera a tuɗ hu ɦoŋzi ma asi a lak huna.

⁸ Ko suuna ŋga Yawe kay ɗegee mamba, u dlara mbuɗ mbuɗta nam laɗ kay suu warnara.

⁹ Kay nam ɦal yona maŋ suu laara casina, hoɓ hay suu mayra casina may.

¹⁰ Suu daŋŋa laki duk ndufunda, njuni ga u kinjiŋŋa, asi ka las hu daŋgayna.

¹¹ Kay asi hum ka u gaɗta vi Lonaraɗi, asi ŋgel gaɗta vi ma Kolo Dayna.

¹² Asi maŋ tasi ki u lassa cocoo, sesi daɓ lay sa ma njunusi kaɗi.

¹³ Asi yi kolo eg Yawe hu las masira, nam suɗusi ki hu wihaw masira.

¹⁴ Nam taɗasi ay ki duk ndufunda, hu lina vi suu miɗina, nam kaasi kinjiŋ ma sesina kiyo.

¹⁵ Ko suuna ŋga Yawe kay ɗegee mamba, u dlara mbuɗ mbuɗta nam laɗ kay suu warnara.

¹⁶ Kay nam kus kawi ma fun zinana kiyo, kus kawi ma fun goŋgana ki lay.

¹⁷ Suu giniŋŋa u poy masira cora ci maɗna, dla coosira mbuɗusi ki coo,

¹⁸ may va ma ti ka kasi oloɗi lay, asi tew ki na tok eg li ma miɗ kina.

¹⁹ Asi yi kolo eg Yawe hu las masira, nam suɗusi ki hu wihaw masira.

²⁰ Nam sun boy mamma ay a garaɗasi kira, paɗasi ay ki hu zulla may.

²¹ Ko suuna ŋga Yawe kay ɗegee mamba, u dlara mbuɗ mbuɗta nam laɗ kay suu warnara.

²² Asi li ɓivun ma gi deɓpa maŋ Lona, di ki kay sun mamba u furira.

²³ Suu daŋŋa tuɗ duk mbo lum ŋgolna u lum kawina, li sun masira duk mbo ŋgolna,

²⁴ suu asina wi sunda Yawe laɗ u bik komba, u dlara mbuɗ mbuɗta duk mbo lum ŋgolna.

²⁵ Boy ma nam damma col babaa ma ŋgolna kolo kay mbona, bil mbona ka kolo u lum kawina cocoo.

²⁶ Lum kawina tuɗ koloo, hoŋ ga hu gaalina, suu hurumma mbuɗ ki ndaa cocoo.

²⁷ Tasi mbuɗ ki ndaa cocoo, asi mbuɗ ko suu gurɗi u sumana na, yal masina viɗ ki irisi na halaŋ halaŋ.

²⁸ Asi yi kolo eg Yawe hu las masira, nam paɗasi ay ki hu wihaw masira,

²⁹ nam col bil mbona na ɗigiɗ gaw, mbo ma li ɓaɗna seŋ tam halaŋ.

³⁰ Asi mbuɗ furira kay mbona seŋ tamba, Lona tinisi ha ki hu li ma asi min taɓa ki huna.

³¹ Ko suuna ŋga Yawe kay ɗegee mamba, u dlara mbuɗ mbuɗta nam laɗ kay suu warnara.

³² Asi geleɗem hu li ma suuna ka toki huna, ŋgaam hu li ma suu ŋgolona tok tasi huna may.

³³ Lona ndak a mbuɗ lumma ki li ma mbassa, mbuɗ li yona huna ki li ma yo hawra.

³⁴ Mbuɗ ndaŋgara jiv tlena ki a ndaŋgara himiina, ni kay cora vi suu ka cuki hu mbas ndaɗtana.

³⁵ Nam ndak a mbuɗ li ma mbassa ki li ma mbona, li ma haw yona ki li ma yona huna may.

³⁶ Nam cuk suu mayra casina huwa asi ka ɦoŋzina ki hu li namma.

³⁷ Asi zum senena huwa, horok sene gugutlura hu may, asi ka ti vuɗ tle asina.

³⁸ Lona paɗ vunum ki kasiya, asi zul cocoo, yoori masisina zul coco lay.

³⁹ Suu daŋŋa hoŋ ki dagan ko lassa su kasira.

⁴⁰ Nam tin lassa kay suu ɦizi suu ka huna, Nam viɗisi ki ŋgoo bagi hu li ma bay voɗta huna.

⁴¹ Nam ka gol suu hawra ko lassa, zulusi suu masisina ko yoorina na.

⁴² Hu li namma suu ɗegeena furi cocoo, bay ɗegeera ka hu oloɗi.

⁴³ Sa ma min a mbuɗ yalna ni gege? Nam gol tlesuu li asina jiviya, a suuna wi jivira vi Yawe ki jivi may.