SOOLLA 106 - Boy Lonana

Jivira vi Yawe kay suu mamsina

¹ Halleluya. Ŋgaagi Yawe kay nam jiviya, ɗegee mamba ka ni na din din.

² Sa ma ndak a wi sunda ŋgolora vi Yawe ni gege? Sa ma ndak a ŋgaam ŋgol mambana ni gege?

³ Furira ka kay suu li jivira u suu ka li u ɗegeera hu buuna halaŋŋa.

⁴ Hu li ma humuŋ gaŋ ay kay suu maŋsina wa ni aŋ saa ay kan may Yawe. Aŋ a suɗusi kira ni gol iriŋ ay kan may.

⁵ Hinin an wi jivira vi suu aŋ manasina u irin may, taɓ furi manda u suu maŋsina may, ɓorow jivira u asi hu mbas maŋga may.

⁶ Ami halaŋŋi ko somoyomi na may, lami cora egeŋu, ami hiniŋ voɗ maŋga kiyo, ami mbuɗ ki ni suu cona.

⁷ Somoyomi ay hu Egipte ni hum dlara mbuɗ mbuɗta aŋ laɗta kaɗi. Asi maa ki kay jivi maŋga halaŋ, asi mbuɗ tasi a suu duu u aŋŋa fun mbo Lum ŋgol ma Cerewna.

⁸ Nam suɗusi ki ni kay nam vi vunum ki ana nam min suɗusi kiyora ni kay a tak ki ni ŋgol mamba.

⁹ Nam so mbo lumma Cerewna kiyo, hinisi asi tuɗ kay ndaŋgara ko ndal hu li ma mbassa ɦawa na.

¹⁰ Nam suɗusi ki ko suu babali masisina, nam doo kasi ko suu duu u asina.

¹¹ Mbo lumma hoŋ kuluɓ kay suu babali masisina, asi ba ki halaŋ, sa suɗ ka dewɗi.

¹² Suu mamsina vi u boy mamma asi gi soolla geleɗ Lonara.

¹³ Na gawni humusi maa ki kay sun mamba, asi juɓ dlara Lona min a laɗ kasi fokka kaɗi.

¹⁴ Ŋgoo bagi hu fulla ni hurusi gijaŋ saa kay tlena, hu li ma asi ki ŋgoona, asi gijaŋ tuk Lona u boyna.

¹⁵ Lona hasi va ma asi joɓom kamma, may Lona sunusi tuguɗiira ay kasiya.

¹⁶ Hu li ma asi ka ŋgoo bagina, asi mbuɗ yara eg gi Moiz u Aaron sa ma Yawe manam kina.

¹⁷ Vun ndaŋgara mal ki lik Datan kiyo, ndaɗ kuluɓ suu vi Abiramma ki halaŋ.

¹⁸ Kura ŋgalasi suu masi suu duuna kiyo, ku ndaɗta ŋgal suu ka wi Lonɗina kiyo.

¹⁹ Hu Horeb asi min lo goo mbutlna, asi goɓ kaŋga fok kawi ma yoorina.

²⁰ Asi mbuɗ bibiŋil Lonara ki u foto mbutl ma ti haɗna ɦawaa.

²¹ Humusi maa ki kay Lona ma suɗusina, ma li dlara mbuɗ mbuɗta ŋgolora ay hu Egiptena,

²² li dlara mbuɗ mbuɗta ay hu mbassa vi Kamba. Li sunda mbuɗ mbuɗta hu mbo lum ma Cerewna.

²³ Lona hal gin a baasi ki halaŋ, na may Moiz sa ma nam manamma col ki fokomu, cenem kay nam heɓ hurum kiyo.

²⁴ Asi gol mbas mayra jivi cocora ki lalasi, asi vi ka u boy mammaɗi.

²⁵ Asi laki hu mbutluɓ masina ni gurni eg Lona, hum ka u del Yawe ta nam dasiraraɗi.

²⁶ Lona tli kom kolo suu tam ana, nam hinisi asi daɓ ki miɗna ŋgoo bagi hu fulla,

²⁷ nam njayasi njafasi ki duk njaf suu ɦawana hu duliyara halaŋ. Nam casi ha ki duk suu ɦawana.

²⁸ Olo, asi gijaŋ goɓ kaŋga fok Baal Peor, asi ti ɓivun ma lam maŋ suu miɗinana.

²⁹ Dlaasi ndaɗta ɓeŋ huu Bu Suuna ki cocoo, tuguɗiira cora ndi kasiya.

³⁰ Na ɗaŋŋi Pinhas col kolo kaɓakŋa kay suu li cora, tuguɗiira hin hinisiya.

³¹ Lona gol dla ndaɗta irimmi a sunda jivira, ha fok na gak gak kay njaf suu Israelna.

³² Hu li ma asi tew tok eg mbo ma Meribana, asi ɓeŋ huu Lona olo. Hu li namma Moiz fi daŋgayna lay,

³³ hu li ma Moiz hurum ɓeŋ kina ni, nam ɓak boyna maŋ Lona ni ka saa oloɗi.

³⁴ Asi ci suu hu mbassa ndaɗta ka ki halaŋ ko Yawe dasira naɗi.

³⁵ Asi ɗumusi goryosi usiya, gijaŋ a goɓ loogi suu ɦawana ko asi na may.

³⁶ Asi sunusi fuli masisina, boy namma mbuɗ ni daw ma vasina.

³⁷ Asi li ɓivunna ki u goryosiya. Ҥal gorɓii masisina ki maŋ fulina.

³⁸ Asi vo busu ma li co kaɗina ki gaa, busu gor njufii masisina u gorɓii masisina, asi li ɓivunna maŋ fuli suu Kanaanna, asi ɓalak mbassa ki u busuna wa.

³⁹ Asi mbuɗ tasi ki nje njera u dlara asi laɗta, asi mbaɗ Lona u fuli suu asi goɓosina.

⁴⁰ Huu Yawe ɓeŋ eg suu mamsina, nam ba suu gin a suu mamsinana kiyo.

⁴¹ Nam yow kom ki kasiya, hinisi ki maŋ suuna, suu babali masisina kak ki mulla kasiya.

⁴² Suu babali masisina lasasiya, asi ɦeɓesi a asi hum usiya.

⁴³ Nam buɗusi ki hu lassa sem bolowo, asi ka so hurusi hu dla cora gak gak, asi cuk gaa hu dla coosira.

⁴⁴ Nam ka golosiya, hu ku na nam humusi tii masina.

⁴⁵ Humum gam kay galamba nam vaɗ u asira u ɗegee mamba nam wasi hahawasiya.

⁴⁶ Nam mbuɗusi hurusiya, asi mbuɗ irim hahawi, ko dlara ka lasira halaŋ.

⁴⁷ Suɗumi kiyo, Yawe, Loomina, tokomi ay ki duk njaf suu daŋŋa. Ami hin geleɗeŋŋi seŋ ma teteɗna, ami hin ɦaŋ ŋgolla ni maŋ aŋ dew.

⁴⁸ Gi deɓpa maŋ Yawe, Lona vi suu Israelna, ay hu gijaŋŋa ha fok na gak gak. Suu halaŋŋa di ana, «Amin.» Amen. Halleluya.