SOOLLA 105 - Boy Lonana

Lona u suu mam suu Israelna

¹ Ŋgaagi Yawe, dagi ki kay semu, takam dlaamba ha ki duk suuna.

² Gagi soolla geleɗemba, luurugi fokomu, di ki kay dlaamba mbuɗ mbuɗta.

³ Lagi furira kay sem ma teteɗna, agi suu hal Yawena furiyugiya.

⁴ Halagi Yawe u saɓak mamma, halagi li ma nam ka huna tew tew.

⁵ Humugi gagi kay dlara mbuɗta nam laɗta, takka u ɓak ma kal ay ki funumma,

⁶ agi njaf Abraham saam ma sunda, agi goryoŋ Yakob suu nam managina.

⁷ Yawe nammi Looygina, nam ti kay yam ndaŋgara halaŋ.

⁸ Nam ka gi humba kay galam mamba tew tew, gaɗ mamba ha ni kay njaf suuna fok na gak gak.

⁹ Ni galamba nam vaɗ ay u Abraham dayra, hin suu tam fok Isaak na olo.

¹⁰ Nam njun galamba din dinda u Yakob, galam ndaɗta ni kay suu Israelna a fafaɗta,

¹¹ hu li ma nam di ana, «An ɦaŋ ndaŋgara Kanaanda, ndaɗ hin ki ni a mbas maŋga»

¹² Hu li namma ni suu Israelna ka zuli ŋgolɗi, asi cuki hu li ma namma ni a ŋgayagina.

¹³ Asi poy kay yam mbassa ni na cow cow, tuɗ vi mulina na zeɗ zeɗ.

¹⁴ Lona ka hin sa a ŋgenem suu mamsinaɗi, nam gaɗ muli suu lasasina,

¹⁵ «Ŋgenegi suu man suu Lona fuurusinaɗi, lagi dla co eg suu jok vun Lonaɗi.»

¹⁶ Nam gi may ŋgolla kay suuna, nam yowosi tlesuu tira ki kasiya.

¹⁷ Nam sunusi sa ma ha ki fokosi dew, ni Yosef ma asi gusum ha ki ko mbaɓuna nana.

¹⁸ Asi cukum kinjiŋŋa semu, cukum galina kelem may,

¹⁹ ta ta tew hu li ma ŋgaama boy ma vi Yawena tukumu.

²⁰ Mulna hal voɗta ana buɗum kiyo, mul ma kay suunana buɗum ki wa.

²¹ Nam kakam a ŋgolla kay ziimma, a ŋgolla kay tlegeyem suu vona halaŋ.

²² Ҥam saɓakŋa a gaɗ suu vona halaŋ, nam haɗ suu ŋgolo suu kaɓakŋa lay.

²³ Suu Israelna tuɗ ha ki hu Egipte. Yakob mbee ha ki hu mbassa vi goryoŋ Kamma.

²⁴ Lona zul suu mamsina cocoo, asi mbuɗ saɓak a su suu babali masisina.

²⁵ Nam mbuɗ huu suu Egiptena co eg suu mamsina, asi gijaŋ lasasi cocoo.

²⁶ Nam sun saam ma sunda, Moiz, u Aaron, sa nam manamma haa.

²⁷ Boy masina mbaa takka hu Egipte cocoo, dlara mbuɗta vi Lonara li hu mbassa vi Kamba.

²⁸ Nam sun ndufunda aya, ndaɗ mba may, kay suu Egiptena humum boy mamma kaɗi.

²⁹ Nam mbuɗ mbona ki busuna, ci kulufna ki duk mbona halaŋ.

³⁰ Mbas masira oy ki u luu gigidina halaŋ, ta ta hu zira buuna vi muli masina lay.

³¹ Nam ɓak u vunum na ni lolona u furutna oy ki hu mbas masira.

³² Nam si dlaŋmagina ay kasi ko mbona na, kura si ay ga hu mbas masira.

³³ Nam casi gu gugutlu masira u gu tulumma kiyo, bowosi ŋgusugi suu hu mbas masirana ki gaa.

³⁴ Nam cukusi baa jeena ki hu mbas masira, njonjoŋŋa ka ndumbi.

³⁵ Asi ti tlesuu hu senenana ki halaŋ halaŋ, tlesuu vuɗna asi tasi ki bel bel.

³⁶ Ci gor suu vuɗ jew suu hu mbas ndaɗtana ki halaŋ, ni goryosi suu vuɗ jewna.

³⁷ Nam cuk suu mamsina ay ki u gursura u lorra kosiya. Asi halaŋ cuk ay ki jiviya, va ŋgen sa ka usiɗi.

³⁸ Suu Egiptena furi kay asi cuk kira, kay asi mbuɗ ki ndaa kosi cocoo.

³⁹ Nam baarasi ɗugulla kasi ko ndal gojolina na, njeŋge ni nam tinisi kura kolo kasiya.

⁴⁰ Hu li ma asi joɓomma, nam cukusi cekera ay a komba, nam hoɓosi u fu ma col ay kolo huulona.

⁴¹ Nam co duk ɦinira ɦasi yona a cira, mbona ɓaɗ ay ki hu ko mbo lumma na.

⁴² Humum gam kay boy mam ma teteɗna ma nam dam maŋ Abraham, saam ma sundana.

⁴³ Nam cuk suu mamsina ay ki u furira, suu nam manasina tuɗ u soolla ayra irisiya.

⁴⁴ Nam ɦasi mbassa vi suu daŋara kiyo, asi ti ni vuɗ tlesuu suuna lasi kana.

⁴⁵ Ni ana asi ŋgomom gaɗ mamba na gak gak may, asi li u gaɗ mamba. Halleluya.